Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 131 Hüküm no: 79 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey b. Ömer Paşa ile ortağı Süleyman Ağa b. Abdullah’ın Karaburun kazası voyvodalığı iltizamından kaynaklanan kaza halkındaki alacaklarını borçlu oldukları Arakil’e havale etmeleri Havâle hücceti Mahmiye-i İslâmbol’da Âşıkpaşa mahallesi ahâlisinden olup hâlâ medîne-i Üsküdar’a tâbi‘ İstavros karyesinde sâkinler Ahmed Bey b. el-merhûm Ömer Paşa ile şerîki Süleyman Ağa b. Abdullah nâm kimesneler meclis-i şer‘-i şerîf-i enverde sarrâf tâifesinden bâ‘isü’r-rakīm Arakil v. ( ) nâm zimmî muvâcehesinde herbiri ikrâr ve takrîr-i kelâm edip biz vilâyet-i Anadolu’da Karaburun kazâsının voyvodalığını bin yüz doksan iki ve doksan üç seneleri iştirâken iltizâm ve zabt, tarafımıza âid olan rüsûmât-ı mukāta‘ât ve avârız ve nüzûldan yedlerine verdiğimiz defter-i müfredât mûcebince mârrü’z-zikr Karaburun ahâlisi ile kazâ-i mezbûra tâbi‘ Kösederesi ahâlisi zimmetlerinde matlûbumuz olan cem‘an on bir bin dört yüz elli iki guruşunu biz bundan akdem mârrü’z-zikr Karaburun ahâlisi ile dört bin iki yüz elli guruşa ve Kösederesi ahâlisi ile üç bin beş yüz guruşa ki cem‘an yedi bin yedi yüz elli guruş üzerine ba‘de akdi’l-musâlaha ve’l-kabûl bedel-i sulh-ı merkūm zimmetlerinde deynleri olduğunu müş‘ir yedimize iki kıt‘a hüccet i‘tâ ve bedel-i sulh-ı merkūm yedi bin yedi yüz elli guruşu taraflarından ceste ceste edâya hâlâ Âsitâne-i aliyye’de Kürkçüler Hanı karşısında mütemekkin gāib ani’l-meclis sarrâf tâifesinden Ohannes nâm zimmîyi tevkîl etmeleriyle bizim dahi merkūm Arakil zimmîye zimmetimizde bâ-defter ve bâ-temessük cihet-i deynden ma‘lûmü’l-mikdâr meblağ deynimiz olmağla biz merkūm Arakil zimmîye deynimiz olan meblağ-ı ma‘lûmenin yedi bin yedi yüz elli guruşu merkūm Arakil zimmîyi vekîl gāib-i merkūm Ohannes zimmî üzerine havâle ve hüccet-i mezkûreleri merkūm Arakil zimmîye teslîm eylediğimizde merkūm Arakil zimmî ile gāib-i merkūm Ohannes zimmî dahi ber-vech-i muharrer kabûl eylediler dediklerini merkūm Arakil zimmî tasdîk etmeğin mâ-vaka‘a. Fî 10 Zilka‘de sene 1196 Şühûdü’l-hâl: Es-Seyyid el-Hâc İsmail Ağa b. Ahmed, Said Beyefendi b. Ömer Paşa, İbrahim Ağa b. Ahmed, Abdullah Efendi b. Abdullah, Molla Ali b. Halil, Mehmed Emin Efendi b. Musa, Haffâf Süleyman Ağa b. Abdullah, es-Seyyid Ahmed Ağa b. es-Seyyid İsmail Ağa.