Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 155 Hüküm no: 112 Orijinal metin no: [17a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çenkar köyünden Osman Beşe’nin bağını Atiyetullah Hanım’a bey bi’l-vefâ yoluyla satması Bey‘ bi’l-vefâ Medîne-i Üsküdar’a tâbi‘ Çenkar karyesinde sâkin Osman Beşe b. Halil nâm kimesne meclis-i şer‘-i şerîf-i enverde bâ‘isetü hâzihi’l-kitâbi’l-müstetâb Atiyetullah Hanım bt. el-merhûm Mehmed Kemaleddin Efendi mahzarında ikrâr ve takrîr-i kelâm edip yedimde mülküm olup karye-i mezbûre hâricinde Çakaldağı nâm mahâlde vâki‘ bir tarafdan benim âhar bağım ve bir tarafdan Ali Beşe bağı ve bir tarafdan sagīr Hamdullah arsası ve bir tarafdan tarîk-i âm ile mahdûd tahmînen yirmi dönüm mikdârı bir kıt‘a müfrez kürûmu mülk bağımı târih-i kitâbdan altı ay tamamına değin istirdâd-ı semen ve teslîm-i mebî‘ etmek üzere bey‘ bi’l-vefâ tarîkiyle mûmâ-ileyhâ Atiyetullah Hanım’a elli üç guruş otuz paraya bey‘ ve teslîm eylediğimde ol dahi ber-vech-i muharrer iştirâ ve tesellüm ve kabûl eyledikden sonra meblağ-ı mezbûr elli üç guruş otuz parayı mûmâ-ileyhâ Atiyetullah Hanım yedinden tamamen ahz ü kabz eyledim dedikde gıbbe’t-tasdîki’ş-şer‘î mâ-vaka‘a. Fî 27 Za sene 1196 Şühûdü’l-hâl: Molla Mehmed b. Osman, İsmail Ağa b. Abdullah, es-Seyyid Mehmed Ağa b. es-Seyyid Ömer ve gayruhum.