Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 154 Hüküm no: 111 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zaim Ahmed Ağa’nın Küçük Langa’daki bahçe gediğini yeğeni Mustafa’ya satması Bağçe gediği mübâya‘ası Mahmiye-i İslâmbol’da Kumkapı kurbünde Nişâncı Mehmedpaşa mahallesinde sâkin Za‘îm el-Hâc Ahmed Ağa b. İsmail tarafından vech-i âtî üzere vekîl olduğu Kayyım Süleyman Efendi b. Eyüb ve İsmail Ağa b. Süleyman nâm kimesneler şehâdetleriyle sâbit olan es-Seyyid Hasan Ağa b. es-Seyyid Ebîbekir nâm kimesne meclis-i şer‘-i şerîf-i enverde müvekkil-i mezbûrun li-ebeveyn kız karındaşı kızının oğlu işbu bâ‘isü’l-kitâb Mustafa b. el-Hâc Mehmed nâm kimesne mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkil-i mezbûrun bâ-hüccet-i şer‘iye yedinde mülk ve hakkı olup mahmiye-i mezbûrede Küçük Langa kurbünde vâki‘ Süleyman Efendi Bostanı demekle arîf bostandan müfrez bir kıt‘a bostan derûnunda mevcûd beyne’l-hıref gedik ta‘bîr olunur sonradan mağrûs eşcâr-ı müsmire ve yirmi tahta pür-hâssa ve yirmi tahta turp ve on tahta soğan ve on tahta mi‘de-nüvaz ve on tahta saluta ve dört bel ve üç tarak ve bir tencere bâ-kapak ve dört arka sepeti ve bir heğbe sepeti ve sâir âlât-ı lâzıme-i ma‘lûmesini tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr Mustafa’ya altı yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan altı yüz guruşu müvekkilim mezbûr el-Hâc Ahmed Ağa mezbûr Mustafa yedinden tamamen ahz ü kabz eyledi, ba‘de’l-yevm mârrü’z-zikr gedik ta‘bîr olunan eşcâr-ı müsmire ve sebzevât-ı mezrû‘a-i müdrike ve sâir âlât-ı lâzıme-i ma‘lûmede müvekkilim mezbûr el-Hâc Ahmed Ağa’nın kat‘a alâka ve medhali kalmayıp mezbûr Mustafa’nın mülk-i müşterâsı ve hakk-ı sarfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 2 min-Zilhicceti’ş-şerîfe sene 1196 Şühûdü’l-hâl: Süleyman Efendi b. Ali İmâm-ı mahalle-i mezbûr, Mustafa Ağa b. el-Hâc Ömer Ağa Kethudâ, Cerrâh İshak İmâmı İsmail Efendi, Ali Beşe b. Ömer, Mehmed b. Mehmed, Molla Ali b. Halil, es-Seyyid Halil b. Mehmed, Kayyim Süleyman Efendi b. Eyüb, İsmail b. Süleyman ve gayruhum.