Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 156 Hüküm no: 114 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerâğî Hasan mahallesinden Abdurrahman Ağa’nın Davudpaşa mahallesindeki ev arsasını hanımı Fatma bt. İsmail’e satması Menzil mübâya‘ası Mahmiye-i İslâmbol’da Çerâğī Hasan mahallesinde sâkin Abdurrahman Ağa b. Salih Efendi meclis-i şer‘-i hatîr-i lâzımü’t-tevkīrde zevce-i menkûhası olup zâtı vech-i şer‘î üzere mu‘arrefe olan işbu râfi‘atü’l-vesîka Fatıma bt. İsmail nâm hatun mahzarında ikrâr ve takrîr-i kelâm edip akd-i âti’z-zikrin sudûruna değin mukaddemâ mezbûre Fatıma Hatun’dan müşterâ bâ-hüccet-i şer‘iye yedimde mülk ve hakkım olup mahmiye-i mezbûrede Davudpaşa mahallesinde kâin bir tarafdan Âişe Hatun menzili arsası ve bir tarafdan Mühürdâr Abdullah Efendi veresesi arsası ve bir tarafdan tarîk-i hâs ve bir tarafdan tarîk-i âm ile mahdûd terbî‘an iki yüz zirâ‘ muhterik mülk menzil arsamı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Fatıma Hatun’a yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm yüz guruş mütâlebesinden dahi mezbûre Fatıma Hatun’un zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm arsa-i mahdûde-i mezkûrede benim aslâ alâka ve medhalim kalmayıp mezbûre Fatıma Hatun’un mülk-i müşterâsı olmuşdur dedikde gıbbe’t-tasdîki’ş-şer‘î mâ-vaka‘a. Fî 4 Zilhicce sene 1196 Şühûdü’l-hâl: Fahrü’l-eimme Hüseyin Efendi b. Hasan, Mehmed Salim Efendi b. Hüseyin, es-Seyyid Ömer Efendi b. ( ), es-Seyyid el-Hâc İsmail Ağa b. Ahmed, diğer İbrahim Çavuş Ağa b. Ali, Hüseyin Çavuş Ağa b. Ahmed, İbrahim Ağa b. Mehmed, Hüseyin Efendi, Molla Ali b. Halil.