Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 157 Hüküm no: 115 Orijinal metin no: [17b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerâğî Hasan mahallesinden Fatma bt. İsmail’in kocasından boşanması Muhâla‘a ve sâireden ibrâ Mahmiye-i İslâmbol’da Çerâğī Hasan mahallesinde sâkine ve zâtı vech-i şer‘î üzere mu‘arrefe olan Fatıma bt. İsmail nâm hatun meclis-i şer‘-i şerîf-i enverde zevc-i dâhili işbu bâ‘isü’l-vesîka Abdurrahman Ağa b. Salih Efendi mahzarında ikrâr ve takrîr-i kelâm edip mezbûr Abdurrahman Ağa zevcim olup lâkin beynimizde hüsn-i zindegânemiz olmamağla ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan yirmi guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Abdurrahman Ağa ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve mezbûr Abdurrahman Ağa âhara ferâğ ve kasr-ı yed ve kabz-ı bedel eylediği ma‘lûmü’l-mikdâr gümrük vazîfemin bedeli olan iki yüz guruşa ve bundan akdem zevcim mezbûr Abdurrahman Ağa’ya mâlımdan hibe ve bey‘ ve temlik ve teslîm edip hâlâ bana redd ü teslîm ve ben dahi bi-a‘yânihâ ahz ü kabz eylediğim bâ-defter-i müfredât eşyâ-i mütenevvi‘a-i ma‘lûmeye ve sâire müte‘allika âmme-i de‘âvî ve kâffe-i mutâlebât ve eymân ve muhâsamâtdan zevc-i muhâlı‘ım mezbûr Abdurrahman Ağa’nın zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 5 Zilhicce sene 1196 Şühûdü’l-hâl: Şâhidûn-ı sâbıkūn.