Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 170 Hüküm no: 132 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Macunî Kasım mahallesinden Mustafa Ağa’nın arsasını Hafız Ahmed’e satması Arsa mübâya‘ası Mahmiye-i İslâmbol’da Ma‘cûnîkasım mahallesinde sâkin es-Seyyid Mustafa Ağa b. el-Hâc Mehmed Emin meclis-i şer‘-i şerîf-i enverde işbu bâ‘isü’l-vesîka Hafız Ahmed Efendi b. Hafız Hüseyin mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ iki tarafdan Müezzin Süleyman Efendi arsası ve bir tarafdan Süleyman Usta menzili ve bir tarafdan tarîk-i âm ile mahdûd mârrü’z-zikr Müezzin Süleyman Efendi taraflarından taş duvarı müştemil terbî‘an otuz altı buçuk zirâ‘ muhterik berber dükkânı arsamı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Hafız Ahmed Efendi’ye yetmiş üç guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yetmiş üç guruşu mezbûr Hafız Ahmed Efendi yedinden tamamen ahz ü kabz eyledim, ba‘de’l-yevm mârrü’z-zikr taş duvarı müştemil arsa-i mahdûde-i mezkûre mezbûr Hafız Ahmed Efendi’nin mülk-i müşterâsı ve hakk-ı sarfı olup benim aslâ alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 21 Zilhicce sene 1196 Şühûdü’l-hâl: Ebûbekir Efendi b. Abdülkerim, Şehrî Mehmed Ağa b. Mehmed, es-Seyyid Haşim b. Mustafa, Molla Mustafa b. Abdullah, Bostânî Mustafa b. Ali, Süleyman Usta b. Ali, Molla Ali b. Halil.