Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 169 Hüküm no: 131 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terkos nahiyesi Şamlar köyünden Zeliha bt. Mehmed’in bakmakta olduğu küçük kızı için boşandığı kocasından nafaka alması Nafaka-i sagīr Havâss-ı Refî‘a kazâsına muzâfe Terkos nâhiyesine [tâbi‘] Şamlar karyesinde sâkine ve zâtı vech-i şer‘î üzere mu‘arrefe olan işbu râfi‘atü’l-vesîka Zeliha bt. Mehmed nâm hatun meclis-i şer‘-i hatîr-i lâzımü’t-tevkīrde zevc-i sâbıkı es-Seyyid Ahmed b. Mehmed nâm kimesne mahzarında takrîr-i kelâm ve ifâde-i merâm edip zevc-i sâbıkım mezbûrun firâşından hâsıla ve benden mütevellide ve bi-hakkı’l-hıdâne hâlâ hacr u terbiyemde olan Şerife Tayyibe nâm sagīrenin nafaka ve kisveye muhtâce olmağla kızım sagīre-i mezbûrenin nafaka ve kisvesi içün babası mezbûr üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dediğini mezbûr es-Seyyid Ahmed ba‘de’t-tasdîk hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīre-i mezbûrenin nafaka ve kisvesi içün babası mezbûr es-Seyyid Ahmed üzerine bi’t-terâzî târih-i kitâbdan küllü yevm on üç akçe farz ve takdîr edip meblağ-ı mefrûz-ı mezkûru sagīre-i mezbûrenin nafaka ve kisvesine harc ü sarfa ve lede’l-hâce istidâneye ve inde’z-zafer babası mezbûr es-Seyyid Ahmed üzerine rücû‘a mezbûre Zeliha Hatun’a izin vermeğin mâ-vaka‘a bi’t-taleb. Fî 20 Zilhicceti’ş-şerîfe sene 1196 Şühûdü’l-hâl: Molla Ali b. Halil, Salih b. Halil, el-Hâc Hasan b. Osman, Mustafa b. Mustafa.