Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 171 Hüküm no: 135 Orijinal metin no: [20b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bozok kazası halkından olup Manastır kaymakamının hizmetinde iken vefat eden Yusuf b. Abdullah’ın terekesinin, vârisi olan halası Emine’ye teslim edilmesi Terekeyi ahz ü kabz Fi’l-asl vilâyet-i Anadolu’da Bozok kazâsı ahâlisinden olup vilâyet-i Rumeli’nde Manastır kāimmakāmı es-Seyyid Yusuf Bey’in hizmetinde iken bundan akdem vefât eden diğer Yusuf b. Abdullah’ın verâseti zî-rahm cihetinden ancak li-ebeveyn ammetesi olup mahmiye-i İslâmbol’da Uzun Yusuf mahallesinde sâkine Emine bt. Osman nâm hatuna münhasıra olduğu tahakkukundan sonra zâtı vech-i şer‘î üzere mu‘arrefe olan mezbûre Emine Hatun meclis-i şer‘-i şerîf-i enverde tereke-i müteveffâ-yı mezbûra bi’l-emâne vâzı‘ü’l-yed olan işbu bâ‘isü’l-vesîka Vekîl-i harc Ahmed Ağa b. Abdullah nâm kimesne tarafından vech-i âtî üzere tasdîka vekîl olduğu ber-nehc-i şer‘î sâbit olan el-Hâc Osman Ağa b. el-Hâc İbrahim mahzarında bi’l-verâse ikrâr-ı tam ve takrîr-i kelâm edip mûrisim müteveffâ-yı mezbûr diğer Yusuf’un hîn-i vefâtında yanında mevcûde terekesi ma‘rifet-i şer‘le tahrîr ve füruht olunup mümzâ ve mahtûm defter-i kassâm olunmağla mûrisim müteveffâ-yı mezbûrun ber-mûceb-i defter-i kassâm terekesinden ba‘de ihrâci’l-mesârifi’l-lâzıme sahhu’l-bâkī olup müvekkil-i mezbûr Ahmed Ağa bi’l-emâne vâzı‘ü’l-yed olduğu cem‘an kırk bin üç yüz altmış dokuz akçeyi getirip bana def‘ ve teslîm eyledikde ben dahi meblağ-ı merkūm kırk bin üç yüz altmış dokuz akçeyi müvekkil-i mezbûr Ahmed Ağa yedinden bi’l-verâse bi’t-tamam ve’l-kemâl ahz ü kabz [20aM] edip mûrisim müteveffâ-yı mezbûr diğer Yusuf’un hâric ez-defter ve dâhil ez-defter terekesine ve bi’l-cümle hukūk-ı mîrâsa müte‘allika âmme-i de‘âvî ve kâffe-i mutâlebât ve eymân ve muhâsamâtdan müvekkilim mezbûr Ahmed Ağa’nın zimmetini ibrâ ve ıskāt eylediğimde ol dahi ber-minvâl-i muharrer ibrâmı kabûl eyledi dedikde gıbbe’t-tasdîk. Fî 21 min-Zilhicce sene 1196 Şühûdü’l-hâl: Abbas Ağa b. Mustafa, Ali Çavuş Ağa b. Hüseyin, Müezzin Mustafa b. Halil, Ahmed Ağa b. İsmail, Molla Ali b. Halil, Ahmed Çavuş Ağa b. Ahmed, Ali Efendi b. Mehmed İmâm vekîli.