Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 172 Hüküm no: 136 Orijinal metin no: [20M/a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçükçekmece nahiyesi Makrihora köyünden İmâm Şeyh Ahmed Efendi’nin bağını Mustafa Ağa’ya satması Bağ mübâya‘ası Havâss-ı Refî‘a kazâsına muzâfe Küçükçekmece nâhiyesine tâbi‘ Makrihora karyesinde sâkin İmâm eş-Şeyh Ahmed Efendi b. Mustafa tarafından ber-vech-i âtî vekîl olduğu es-Seyyid Hüseyin b. Mehmed ve es-Seyyid Salih b. İbrahim nâm kimesneler şehâdetleriyle sâbit olan imâm vekîli es-Seyyid Mehmed Efendi b. es-Seyyid Hamza meclis-i şer‘-i şerîf-i enverde işbu bâ‘isü’l-vesîka es-Seyyid Mustafa Ağa b. es-Seyyid Mehmed nâm kimesne mahzarında bi’l-vekâle ikrâr ve takrîr-i kelâm edip müvekkilim mezbûrun yedinde mülk ve hakkı olup karye-i mezbûrede vâki‘ bir tarafdan Sadullah Efendi bağı ve bir tarafdan İbrahim Efendi bağı ve bir tarafdan Keskin Hüseyin Ağa bağı ve bir tarafdan müşterî-i mezbûr es-Seyyid Mustafa Ağa bağı ile mahdûd kürûmu mülk nısf dönüm mikdârı bir kıt‘a bağını tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr es-Seyyid Mustafa Ağa’ya otuz guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz guruşu müvekkilim mezbûr İmâm eş-Şeyh Ahmed Efendi mezbûr es-Seyyid Mustafa Ağa yedinden tamamen ahz ü kabz eyledi, ba‘de’l-yevm bağ-ı mahdûd-ı mezkûr mezbûr es-Seyyid Mustafa Ağa’nın mülk-i müşterâsı ve hakk-ı sarfı olup benim müvekkilim mezbûr İmâm eş-Şeyh Ahmed Efendi’nin kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 22 Zilhicce sene 1196 Şühûdü’l-hâl: Sâbıkā Barutçubaşı Ömer Ağa, Sâbıkā Barutçubaşı Hüseyin Ağa, es-Seyyid Hüseyin b. Mehmed, es-Seyyid Salih b. İbrahim, Musa Ağa b. ( ), Süleyman Ağa, Molla Ali b. Halil.