Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 174 Hüküm no: 139 Orijinal metin no: [20M/a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Sava’nın Niğde kazası Fertek köyündeki evini daha önceden amcası Peratmoz’a sattığının tescili İstihbâr-ı menzil Mahmiye-i İslâmbol’da Yedikule hâricinde mütemekkin işbu bâ‘isü’r-rakīm Bağçevân Sava v. Sünbül nâm zimmî meclis-i şer‘-i şerîf-i enverde takrîr-i kelâm ve bast-ı merâm edip vilâyet-i Anadolu’da Niğde kazâsına tâbi‘ Fertek nâm karyede vâki‘ etrâf-ı erba‘ası Eci Bali ve Konosoğlu ve Deli Karagöz zimmîler menzilleri ve tarîk-i âm ile mahdûd on dört kemer ve bir sundurma ve bir kesme ahur ve bir havluyu müştemil bir bâb mülk menzili iki yüz doksan senesi evâhirinde li-ebeveyn ammim olan Peratmoz v. Sava nâm zimmîden yüz guruş semen-i medfû‘ ve makbûza müşterâ [20bM] bâ-hüccet-i şer‘iye yedimde mülk ve hakkım iken hüccetim bundan akdemce vâki‘ olan harîk-i kebîr’de muhterik olmağla takrîrim vukūf-ı tammı olan bî-garaz kimesnelerden suâl ve istihbâr ve haberleri zabt ve tahrîr ve hüccet olunup yedime i‘tâ olunmak matlûbumdur dedikde hakīkat-i hâl mukırr-ı merkūm Sava zimmînin bi’l-cümle takrîr-i meşrûhu üzere olduğunu mahmiye-i mezbûrede Yedikule dâhilinde kâin Bucakbağı mütemekkinlerinden Bağçevân Yako v. Kostandi ve Orham v. Peratmoz ve Yamandi v. Yasef nâm zimmîler meclis-i şer‘de herbiri alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî 27 min-Zilhicceti’ş-şerîfe sene 1196 Şühûdü’l-hâl: Molla Ali b. Halil, Mustafa b. Mustafa, Ömer b. Musli Bağçevân, Todori v. Hıristo, diğer Todori v. Gülistan, Yako v. Royel ve gayruhum.