Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 181 Hüküm no: 148 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçükçekmece nahiyesi Ayastefanos köyünden Peratmoz v. Petro’nun satın aldığı evin hüccetinin yenilenmesi İstihbâr-ı menzil Havâss-ı Refî‘a kazâsına muzâfe Çekmece-i Sagīr nâhiyesine tâbi‘ Ayastefanos karyesi mütemekkinlerinden işbu hâmilü’r-rakīm Peratmoz v. Petro nâm zimmî meclis-i şer‘-i şerîf-i enverde takrîr-i kelâm ve bast-ı merâm edip karye-i mezbûrede vâki‘ bir tarafdan beylik saray ve bir tarafdan Yorgo zimmî menzili ve bir tarafdan Eci İstefan zimmî menzili ve bir tarafdan tarîk-i âm ile mahdûd fevkānî bir bâb oda ve bir sofa ve tahtında bir ahur ve bir mikdâr bağçeyi müştemil bir bâb mülk menzil târih-i kitâbdan on beş sene mukaddem gāibe an[i’l-beled] Ezmerağda nâm Nasrâniyeden semen-i ma‘lûm ve medfû‘ ve makbûza müşterâ bâ-hüccet-i şer‘iye yedimde mülk ve hakkım iken yedimde olan mülknâme hüccetim bundan akdem vukū‘ bulan harîk-i kebîr’de muhterik olmağla menzil-i mahdûd-ı mezkûr ber-vech-i muharrer mülk-i müşterâm olduğu vukūf-ı tammı olan bî-garaz Müslimînden suâl ve istihbâr ve haberleri zabt ve tahrîr ve kıbel-i şer‘den hüccet olunup yedime i‘tâ olunmak matlûbumdur dedikde fi’l-hakīka mahmiye-i İslâmbol’da Aydın Kethudâ mahallesi ahâlisinden es-Seyyid Ahmed b. es-Seyyid Mustafa ve Ahmed b. Mehmed nâm kimesneler meclis-i şer‘a hâzırân, fi’l-hakīka menzil-i mahdûd-ı mezkûr mukırr-ı merkūm Peratmoz zimmînin gāibe-i mersûme Ezmerağda Nasrâniyeden târih-i mezbûrda semen-i medfû‘ ve makbûza müşterâ mülk-i mahzı ve hakk-ı sarfı olduğunu herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî 5 Muharrem sene 1197 Şühûdü’l-hâl: İsmail Efendi b. Halil, Mehmed Ağa b. Ali Kethudâ, Mustafa b. Salih, Molla Ali b. Halil, Eci Toma v. Masko; Martin v. Mago, Cellâd Yorgo v. İstefan.