Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 182 Hüküm no: 149 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ömer mahallesinden Mustafa Efendi’nin yanan evinin arsasını Halil Ağa’ya satması Arsa mübâya‘ası Mahmiye-i İslâmbol’da Seyyid Ömer mahallesinde sâkin Mustafa Efendi b. Hasan meclis-i şer‘-i hatîr-i lâzımü’t-tevkīrde işbu bâ‘isü’l-kitâbi’l-müstetâb Halil Ağa b. Abdullah tarafından vech-i âtî üzere tasdîka vekîli olduğu ber-nehc-i şer‘î sâbit olan Ali Efendi b. Mustafa nâm kimesne mahzarında ikrâr-ı tam ve takrîr-i kelâm edip mahmiye-i mezbûrede Seydihalîfe mahallesinde vâki‘ bir tarafdan Emir odaları ve bir tarafdan ba‘zan Abdülkerim Efendi menzili ve ba‘zan hanım odaları ve bir tarafdan ba‘zan Said Ağa menzili ve ba‘zan Sîmkeş Yakub Beşe menzili arsaları ve bir tarafdan tarîk-i âm ile mahdûd derûnunda üç bi’r-i mâ ve iki kârgîr mahzeni hâvî terbî‘an iki bin sekiz yüz zirâ‘ bir bâb muhterik mülk menzil arsamı tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkil-i mûmâ-ileyh Halil Ağa’ya yedi yüz elli guruşa bey‘ ve temlik ve teslîm ve mârrü’z-zikr Emir odaları tarafında kâin zikr olunan Seydi Halîfe Vakfı’na senevî üç yüz altmış akçe mukāta‘alı terbî‘an sekiz yüz altı buçuk zirâ‘ arsamı dahi yine müvekkil-i mûmâ-ileyh Halil Ağa’ya bâ-ma‘rifet-i mütevellî meccânen ferâğ ve tefvîz eylediğimde müvekkil-i mûmâ-ileyh Halil Ağa dahi ber-vech-i muharrer iştirâ ve temellük ve tesellüm ve tefevvüz ve kabûl eyledikden sonra semeni olan meblağ-ı merkūm yedi yüz elli guruşu müvekkil-i mûmâ-ileyh Halil Ağa yedinden tamamen ahz ü kabz eyledim, ba‘de’l-yevm mülk olan arsa-i mahdûde-i mezkûre müvekkil-i mûmâ-ileyh Halil Ağa’nın mülk-i müşterâsı ve hakk-ı sarfı ve mukāta‘alı arsa-i merkūme dahi bâ-ma‘rifet-i mütevellî dâhil-i taht-ı tasarrufu olup benim aslâ alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 5 min-Muharremi’l-harâm sene 1197 Şühûdü’l-hâl: Cerrâh es-Seyyid İbrahim Ağa b. Halil, el-Hâc Mustafa Çavuş Ağa b. İbrahim, Boşna[k] Hasan Ağa b. Mehmed, İmâm Mustafa Efendi b. Mehmed, Mehmed Salim Efendi b. Hüseyin Efendi, İmâm Ömer Efendi b. ( ), Molla Ali b. Halil, el-Hâc Hasan b. Osman, Nevbetçi Molla Mustafa b. Mustafa, Muhzır Mehmed Çelebi b. ( ), Hüseyin Efendi b. İbrahim ve gayruhum.