Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 200 Hüküm no: 173 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Muslihiddin mahallesinden Fatma bt. Abdullah’ın kocasına mehrini hibe etmesi ve bazı eşyalarını da satması Husûs ile eşyâ mübâya‘ası Kezâlik meclis-i ma‘kūd-ı mezkûrda hâlâ zevci işbu bâ‘isü’l-vesîka Abdullah b. Ahmed mahzarında ikrâr ve takrîr-i kelâm edip zevcim mezbûr ile mahalle-i mezbûrede vâki‘ mâ‘an sâkine olduğum menzil derûnunda mevcûd benim yedimde mâlım ve mülküm ancak zikri âtî eşyâya münhasıra olup bunlardan mâ‘adâ menzil-i mezkûrda mevcûd melbûsât ve mefrûşât ve evân-ı nühâsiye ve gayr-ı nühâsiye ve bi’l-cümle eşyâ-i sâire zevcim mezbûrun mâlı ve mülkü olup benim kat‘a alâka ve medhalim olmamağın zevcim mezbûr zimmetinde ma‘kūdun-aleyh olan yirmi guruş mehr-i müeccelimi hibetü’d-deyn mimmen aleyhi’d-deyn sahîhatün fehvâsınca zevcim mezbûra hibe ve temlik eylediğimde ol dahi ber-vech-i muharrer meclis-i hibede bilâ-mâni‘ ittihâb ve temellük ve kabûl eyledikden sonra eşyâ-i memlûkemden yün memlû sekiz beledî yasdık ve dört minder ve dört yemeni yorgan bâ-çârşeb ve iki beylik ve on beş vakıyye evân-ı nühâsiyemi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevcim mezbûr Abdullah’a kırk guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr kırk guruş mütâlebesinden zevcim mezbûrun zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm mehr-i mezkûr yirmi guruşdan zevcim mezbûr Abdullah’ın zimmeti berî ve eşyâ-i muharrere-i mezkûre mülk-i müşterâsı ve hakk-ı sarfı olup benim aslâ alâka ve medhalim kalmamışdır dedikde gıbbe’t-tasdîki’ş-şer‘î vâki‘ hâli mevlana-yı mezbûr ilâ-âhirihî. Fî 16 Muharremi’l-harâm sene 1197 Şühûdü’l-hâl: Şâhidûn-ı sâbıkūn.