Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 199 Hüküm no: 172 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Muslihiddin mahallesinden Fatma bt. Abdullah’ın evini Âkıle bt. Mehmed’e satarak parasını borcuna takas etmesi Husûs ile mübâya‘a-i menzil ve semenini deyne takas Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden mezûnen irsâl olunan Mevlana Hafız Numan Efendi b. Süleyman mahmiye-i İslâmbol’da Altımermer kurbünde Kâtib Muslihiddin mahallesinde kâin Fatıma bt. Abdullah nâm hatunun menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî eyledikde zâtı Müslimûn-ı merkūmûn ta‘rîfleriyle mu‘arrefe olan mezbûre Fatıma Hatun meclis-i ma‘kūd-ı mezkûrda işbu bâ‘isü’l-kitâb Âkıle bt. el-Hâc Hafız Mehmed Efendi nâm hatunun zevci ve tarafından ber-vech-i âtî tasdîka vekîl olduğu nehc-i şer‘î ve tarîk-i mer‘î üzere sâbit olan Kasab Mehmed Ağa b. Ebîbekir mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup işbu derûnunda akd-i meclis-i şer‘-i kavîm olunan bir tarafdan Çukadâr Abdullah Ağa menzili ve bir tarafdan Osman Beşe kerîmesi menzili ve bir tarafdan Bâzergân odaları ve bir tarafdan tarîk-i âm ile mahdûd fevkānî iki bâb oda ve dehliz ve tahtânî bir bâb oda ve kenîf ve kömürlük ve bağçe ve bir mikdâr havluyu müştemil bir bâb mülk menzilimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müvekkile-i mezbûre Âkıle Hatun’a iki yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki yüz guruşu bundan akdem müvekkile-i mezbûre Âkıle Hatun yedinden müstedân ve makbûz cihet-i karzdan iki yüz guruş deynime takas ve mahsûb eylediğimde ol dahi mukāssa ve kabûl edip ol-vechile deyn-i meblağ-ı mezbûr iki yüz guruşdan benim zimmetim berî’e ve menzil-i mahdûd-ı mezkûr müvekkile-i mezbûre Âkıle Hatun’un mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î vâki‘ hâli mevlana-yı mezbûr mahâllinde ketb ü tahrîr ve mâ‘an ba‘s olunan ümenâ-i şer‘le meclis-i şer‘a gelip alâ-vukū‘ıhî inhâ ve takrîr etmeğin mâ-vaka‘a. Fî 16 Muharrem sene 1197 Şühûdü’l-hâl: Es-Seyyid Ali Efendi b. es-Seyyid Mehmed Emin imâm-ı mahalle-i mezbûre, el-Hâc Mehmed b. Mehmed müezzin, Halil Odabaşı b. Hüseyin, Mustafa Berber, Hacı İbrahim Berber, Hafız Mehmed Emin Efendi b. Mustafa, Molla Ali b. Halil, Çukadâr Mehmed b. Osman.