Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 201 Hüküm no: 175 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun Yusuf mahallesinden Zeliha bt. Musa’nın kocasından boşanması Muhâla‘a Mahmiye-i İslâmbol’da Uzun Yusuf mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Zeliha bt. Musa nâm hatun meclis-i şer‘-i hatîr-i lâzımü’t-tevkīrde zevc-i dâhili işbu bâ‘isü’l-vesîka Mustafa Ağa b. Mehmed mahzarında ikrâr ve takrîr-i kelâm edip mezbûr Mustafa Ağa zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan yüz yirmi guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mustafa Ağa ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mutâlebâtdan ben zevcim mezbûr Mustafa Ağa’nın zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 25 Muharrem sene 1197 Şühûdü’l-hâl: el-Hâc Mehmed Ağa b. Abdullah, Melek Mustafa Ağa b. Osman, Za‘îm Halil Ağa b. Mehmed, Duhânî Abdullah Ağa b. ( ), Mustafa Efendi b. Ömer, Konakçı Ali Efendi, Ali Ağa b. ( ) ve gayruhum.