Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 201 Hüküm no: 176 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sancakdar Hayreddin mahallesinden Mehmed Emin’in tasarrufunda olan vakıf ekmek fırını hissesini Mehmed Sadık’a devretmesi Değirmenden hisse ferâğ ve ibrâ Mahmiye-i İslâmbol’da Sancakdâr Hayreddin mahallesinde sâkin Mehmed Emin b. el-Hâc Ali nâm kimesne meclis-i şer‘-i şerîf-i enverde işbu bâ‘isü’l-vesîka es-Seyyid Mehmed Sadık b. Ahmed nâm kimesne mahzarında ikrâr ve takrîr-i kelâm edip ashâb-ı hayrâtdan Aşçıbaşı Ahmed Efendi nâm sâhibü’l-hayrın vakfı müsakkafâtından olup mahmiye-i mezbûrede Mi‘mâr Acem mahallesinde vâki‘ ma‘lûmü’l-hudûd ve’l-müştemilât altı horos bir bâb ekmekçi fırınının altı sehm i‘tibârıyla iki sehmi kız karındaşım Emetullah Hatun’un ve iki sehmi kız karındaşım mezbûre Emetullah’ın zevci Mehmed b. el-Hâc İsmail nâm kimesnenin ve iki sehmi benim bâ-temessük-i mütevellî taht-ı tasarrufumuzda olduğu hâlde bin yüz seksen bir senesi ben mezbûr Mehmed Sadık yedinden istidâne ve kabz eylediğim sekiz yüz guruş deynim mukābelesinde zikr olunan fırında ber-vech-i muharrer mutasarrıf olduğum iki sehmimi mezbûr es-Seyyid Mehmed Sadık’a bâ-ma‘rifet-i mütevellî vefâen ferâğ ve tefvîz eylediğimde ol dahi tefevvüz eyledikden sonra zikr olunan iki sehmin ücreti olmak üzere mezbûr es-Seyyid Mehmed Sadık’a târih-i mezbûrdan işbu târih-i kitâba gelince beher şehr onar guruş vermiş idim. El-hâletü hâzihî ben deyn-i mezkûrum olan sekiz yüz guruşu mezbûr es-Seyyid Mehmed Sadık’a kable’l-edâ hisse-i mezkûremi mütevellîsi ma‘rifetiyle bi’r-rızâ rehniyetden ba‘de’l-fek zikr olunan fırında mutasarrıf olduğum iki sehmimin bir sehmini sekiz yüz guruş bedel mukābelesinde yine mezbûr es-Seyyid Mehmed Sadık’a bâ-ma‘rifet-i mütevellî ferâğ-ı mu‘teber-i kat‘î ile ferâğ ve tefvîz ve bedel-i mezkûr sekiz yüz guruşu deyn-i mezkûr sekiz yüz guruşa takas ve mahsûb eylediğimde ol dahi ber-minvâl-i muharrer tefevvüz ve mukāssa ve kabûl edip ol-vechile zikr olunan fırında olan iki sehmimin bir sehmi mezbûr es-Seyyid Mehmed Sadık’ın dâhil-i havza-i tasarrufu ve deyn-i mezkûr sekiz yüz guruşdan benim zimmetim berî’e olmağın zikr olunan fırında iki sehmimin bir sehmine ve bedeline ve ücret nâmıyla beher şehr medfû‘um olan onar guruşa ve bi’l-cümle husûs-ı [mezkûra] müte‘allika âmme-i de‘âvî ve kâffe-i mütâlebât ve eymân ve muhâsamâtdan mezbûr es-Seyyid Mehmed Sadık’ın zimmetini ibrâ ve ıskāt eylediğimde ol dahi ibrâmı kabûl eyledi dedikde mezbûr es-Seyyid Mehmed Sadık dahi mukırr-ı mezbûr Mehmed Emin’i cemî‘ kelimât-ı meşrûhasında vicâhen ve şifâhen tahkīk ve tasdîk etmeğin mâ-vaka‘a bi’t-taleb. Fî 25 Muharrem sene 1197 Şühûdü’l-hâl: Es-Seyyid Ali Efendi b. Halil, Hüseyin Efendi b. İbrahim, Çorbacı Hasan Ağa b. Abdullah, el-Hâc Mehmed Esad b. ( ), Suyolcu Mehmed Emin, Kemhacı Mehmed Emin, Molla Ali b. Halil.