Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 204 Hüküm no: 179 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Ayşe bt. Mehmed’in kocasından boşanması Muhâla‘a Mahmiye-i İslâmbol’da Silivrikapısı dâhilinde İbrahim Paşa mahallesinde sâkine ve zâtı vech-i şer‘î üzere mu‘arrefe olan Âişe bt. Mehmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb es-Seyyid Ahmed Ağa b. Halil mahzarında ikrâr ve takrîr-i kelâm edip mezbûr es-Seyyid Ahmed Ağa zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan kırk guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr es-Seyyid Ahmed Ağa ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve hîn-i akidde mehr-i mu‘accel tesmiye olunan altı şayak yasdık ve iki minder ve iki mak‘ad ve bir beledî döşek ve iki yemeni yorgan bâ-çârşeb ve bir baş yasdığı ve bir kaliçe ve iki tencere ve dört sahan bâ-kapak ve bir tâbe ve bir tas ma‘a kapak ve bir sini ve bir leğen ma‘a ibrik ve bir kahve tepsisi ve iki kahve ayağı ve iki fincan ma‘a zarf ve bi’l-cümle hukūk-ı sâireye müte‘allika âmme-i de‘âvî ve kâffe-i mütâlebâtdan ben zevcim mezbûr es-Seyyid Ahmed Ağa’nın zimmetini ibrâ ve ıskāt eylediğimde ol dahi hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 27 Muharrem sene 1197 Şühûdü’l-hâl: İbrahim b. Mustafa, Berber Mehmed Ağa b. Yusuf, Mehmed b. Ali, Molla Ali b. Halil, Ahmed b. Mustafa, Ali Ağa b. Mehmed Kapıkethudâsı, el-Hâc Hasan b. Osman.