Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 203 Hüküm no: 178 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerâğî Hasan mahallesinden Şerife Habibe Hatun’un kocasından boşanması Muhâla‘a Mahmiye-i İslâmbol’da Çerâğī Hasan mahallesinde sâkine ve zâtı vech-i şer‘î üzere mu‘arrefe olan Şerife Habibe Hatun bt. Ali meclis-i şer‘-i şerîf-i enverde zevc-i dâhili işbu bâ‘isü’l-kitâb es-Seyyid Abdurrahman Beşe b. Musa mahzarında ikrâr ve takrîr-i kelâm edip mezbûr es-Seyyid Abdurrahman Beşe zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan yüz guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr es-Seyyid Abdurrahman Beşe ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mütâlebâtdan ben zevcim mezbûr es-Seyyid Abdurrahman Beşe’nin zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 27 Muharrem sene 1197 Şühûdü’l-hâl: İbrahim b. Hüseyin, Abdülkerim Efendi Yazıcı-yı miyân, Molla Ali b. Halil, Berber Cevrî b. ( ), Ali Ağa b. Mehmed, Mustafa b. Mustafa.