Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 205 Hüküm no: 181 Orijinal metin no: [26b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa mahallesinden Ayşe bt. Ahmed’in bakmakta olduğu küçük oğlu için boşandığı kocasından nafaka alması Nafaka-i sagīr Mahmiye-i İslâmbol’da Koca Mustafa Paşa mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Âişe bt. Ahmed nâm hatun meclis-i şer‘-i şerîf-i [enverde] zevc-i muhâlı‘ı es-Seyyid Ali Beşe b. es-Seyyid Mehmed nâm kimesne mahzarında takrîr-i kelâm ve bast-ı merâm edip zevc-i muhâlı‘ım mezbûr es-Seyyid Ali Beşe’nin firâşından hâsıl ve benden mütevellid ve bi-hakkı’l-hıdâne benim hacr u terbiyemde olan sagīr oğlum es-Seyyid Mehmed’in mâlı olmayıp nafaka ve kisve-bahâsı içün babası mezbûr es-Seyyid Ali üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīr-i mezbûrun ber-vech-i muharrer nafaka ve kisve-bahâsı içün babası mezbûr üzerine bi’t-terâzî târih-i kitâbdan küllü yevm beşer para farz ve takdîr edip meblağ-ı mefrûz-ı mezkûru sagīr-i mezbûrun nafaka ve kisvesine harc u sarfa ve lede’l-iktizâ istidâneye ve inde’z-zafer babası mezbûr es-Seyyid Ali Beşe üzerine rücû‘a vâlidesi mezbûre Âişe Hatun’a izin vermeğin mâ-vaka‘a bi’t-taleb. Fî 28 Muharrem sene 1197 Şühûdü’l-hâl: Şâhidûn-ı sâbıkūn. Azeltü nefsî mine’l-kaydiye bilâ-sun‘ı ahadin. Fî-gurreti Saferi’l-hayr sene 1197 Ve ene’l-fakīr Hafız Numan b. Süleyman b. Mehmed -gufira lehüm-