Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 206 Hüküm no: 182 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferikoz mahallesinden Katrine bt. Marat’ın kendisini boşayan kocasının zimmetini ibra etmesi Kefere tatlîk Mahmiye-i İslâmbol hısnı ebvâbından Cebeali Kapısı hâricinde Seferikoz mahallesinde mütemekkine ve şahsı ta‘rîf-i şer‘î ile mu‘arrefe olan Katrine bt. Marat nâm Nasrâniye meclis-i şer‘-i şerîf-i enverde zevc-i mutallıkı işbu bâ‘isü’r-rakīm Apostol v. Anaştaş nâm zimmî muvâcehesinde ikrâr ve takrîr-i kelâm edip mezbûr Apostol zimmî bilâ-tesmiyeti’l-mehr zevc-i dâhilim olduğu hâlde târih-i kitâb günü beni tatlîk edip beynimizde olan alâka-i zevciyet munkatı‘a olmağla mehr-i mislime ve hukūk-ı zevciyete ve zevcim merkūmdan matlûbum olan bir beledî döşek ve iki yorgan ma‘a çârşeb ve iki basma mak‘ad ve penbe kaplı bir sincab kürk ve bir değirmi baş yemenisi ve bir şali entari ve bir Efrenc şali cübbe ve bir çift sîm kuşak ve bir tencere bâ-kapak ve bir sini ve bir sepet sandığa ve sâire müte‘allika âmme-i de‘âvî ve kâffe-i mütâlebâtdan ben zevc-i mutallıkım mezbûrun zimmetini ibrâ ve ıskāt eylediğimde ol dahi kezâlik hukūk-ı zevciyete ve gayra müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mukırre-i mersûme Katrine Nasrâniye yine meclis-i şer‘de zevc-i mutallıkı mezbûr Apostol zimmî muvâcehesinde i‘âde-i kelâm edip zevc-i mutallıkım mezbûrun firâşından hâsılân ve benden mütevellidân hâlâ bi-hakkı’l-hıdâne hacr u terbiyemde olan sagīr oğullarım Todori ve Panayot yedişer yaşını tekmîl edince kendi mâlımdan teberru‘an infâk edip babaları zevc-i mutallıkım mezbûrdan nafaka ve kisve-bahâ mütâlebe etmemek üzere müte‘ahhide oldum dedikde mâ-vaka‘a bi’t-taleb. Fî 28 Muharrem sene 1197 Şühûdü’l-hâl: Molla Ali b. Halil, Salih b. Halil, Hacı Hasan b. Osman ve gayruhum. Bağçevân Yuvan, Bağçevân Nikola, diğer Yuvan Bağçevân.