Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 206 Hüküm no: 183 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamza mahallesinden Ayşe bt. Mehmed’in bakmakta olduğu küçük oğlu için boşandığı kocasından nafaka alması Nafaka-i sagīr Mahmiye-i İslâmbol’da el-Hâc Hamza mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Âişe bt. Mehmed nâm hatun meclis-i şer‘-i şerîf-i enverde zevc-i mutallıkı Musa b. Şaban nâm kimesne mahzarında takrîr-i kelâm ve ifâde-i merâm edip zevc-i mutallıkım mezbûr Musa’nın firâşından hâsıl ve benden mütevellid ve hâlâ bi-hakkı’l-hıdâne hacr u terbiyemde olan sadrî sagīr oğlum Mehmed Sadullah’ın mâlı olmayıp nafaka ve kisveye muhtâc olmağla oğlum sagīr-i mezbûrun nafaka ve kisvesi içün babası mezbûr Musa üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīr-i mezbûrun ber-vech-i muharrer nafaka ve kisve-bahâsı içün babası mezbûr Musa üzerine bi’t-terâzî târih-i kitâbdan küllü yevm on birer akçe farz ve takdîr edip meblağ-ı mefrûz-ı mezkûru sagīr-i mezbûrun nafaka ve kisvesine harc ü sarfa ve lede’l-iktizâ istidâneye ve inde’z-zafer babası mezbûr üzerine rücû‘a mezbûre Âişe Hatun’a izin vermeğin mâ-vaka‘a bi’t-taleb ketb olundu. Fî-gurrei Muharremi’l-harâm sene seb‘a ve tis‘în ve mi’e ve elf. Şühûdü’l-hâl: Osman Efendi b. Ahmed İmâm-ı mahalle-i mezbûr, Müezzin Mehmed b. Mehmed, Ali b. Ahmed, Molla Ali b. Halil, Ali Ağa b. Mehmed Kapıkethudâsı ve gayruhum.