Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 207 Hüküm no: 185 Orijinal metin no: [27a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koruk Mahmud mahallesinden İsmail Ağa’nın evini istiğlal yoluyla Halime Hatun’a satması İstiğlâl Mahmiye-i İslâmbol’da Koruk Mahmud mahallesinde sâkin İsmail Ağa b. Mehmed nâm kimesne meclis-i şer‘-i şerîf-i enverde mahalle-i mezbûrede sâkin iken bundan akdem vefât eden el-Hâc Hüseyin b. Hasan nâm kimesnenin sulbî sagīr oğlu Mehmed’in vâlidesi ve tesviye-i umûrunu rü’yete bâ-hüccet-i şer‘iye vasîyy-i mansûbesi olan işbu bâ‘isetü’l-vesîka Halime Hatun bt. Osman tarafından vech-i âtî üzere tasdîka vekîl olduğu ber-nehc-i şer‘î sâbit olan el-Hâc Halil Ağa b. Ali nâm kimesne mahzarında ikrâr ve takrîr-i kelâm edip bâ-hüccet-i şer‘iye yedimde mülk ve hakkım olup mahalle-i mezbûrede vâki‘ bir tarafdan ba‘zan Çelebi Abdülkerim menzili ve ba‘zan Bezzâzistânî Abdi Ağa menzili ve bir tarafdan Mukābele-i Süvârî Kalemi kîsedârı Salih Efendi Vakfı’ndan menzil ve bir tarafdan tarîk-i âm ile mahdûd büyût-ı adîde ve müştemilât-ı sâire-i ma‘lûmeyi hâvî bir bâb mülk menzilimi bi-tarîki’l-istiğlâl müvekkile-i mezbûre Halime Hatun’a bey‘ ve temlik eylediğimde ol dahi sagīr-i mezbûrun mâlıyla ber-vech-i muharrer iştirâ ve tesellüm ve kabûl eyledikden sonra meblağ-ı mezbûr bin guruşu vasî müvekkile-i mezbûre Halime Hatun yedinden tamamen ba‘de’l-ahz ve’l-kabz yine vasîyy-i mezbûre menzil-i mezkûru gıbbe’t-tahliyeti’ş-şer‘iye ve’t-tekābuzi’l-mer‘î târih-i kitâbdan beher şehr on ikişer buçuk guruş ücret tesmiyesiyle bi’l-vesâye bana îcâr ve teslîm eyledikde ben dahi ber-vech-i muharrer istîcâr ve tesellüm ve kabûl eylediğimden sonra ben deyn-i meblağ-ı mezbûr bin guruşun beş yüz guruşunu târih-i mezbûrdan yedi ay ve iki yüz elli guruşunu on iki ay ve iki yüz elli guruşunu dahi on altı ay tamamında ki cem‘an bin guruşu va‘de hulûlünde kendüye tamamen edâ ve teslîme ben ve ol dahi menzil-i mezkûru rehniyetden fekk ve geri bana teslîme herbirimiz ta‘ahhüd eyledik dedikde vekîl-i mezbûr el-Hâc Halil Ağa dahi mukırr-ı mezbûr İsmail Ağa’yı cemî‘ kelimât-ı meşrûhasında vicâhen ve şifâhen tahkīk ve tasdîk etmeğin mâ-vaka‘a bi’t-taleb. Fî 29 Muharrem sene 1197 Şühûdü’l-hâl: Mustafa Efendi b. Ahmed, Mehmed Çavuş Ağa b. Yusuf, Osman Çavuş Ağa tâbi‘-i Ahmed, el-Hâc Mehmed Ağa b. Abdullah, Molla Ali b. Halil, es-Seyyid Ahmed Ağa b. el-Hâc Hüseyin.