Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 208 Hüküm no: 186 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostanî Abdullah Ağa mahallesinden olup Adana’dan gelirken yolda vefat eden Hüseyin b. Abdullah’ın terekesini vârislerinin teslim alması Terekeyi ahz ü kabz Mahmiye-i İslâmbol’da Aksaray kurbünde Bostânî Abdullah Ağa mahallesi ahâlisinden olup bundan akdem vilâyet-i Anadolu’da Adana kazâsından Âsitâne’ye gelir iken esnâ-i tarîkde Misis nâm mahâlde fevt olan el-Hâc Hüseyin b. Abdullah’ın verâseti zevce-i menkûha-i metrûkesi Ümmügülsüm bt. el-Hâc Süleyman nâm hatun ile sulbî sagīr oğlu Ahmed’e ve sulbiye sagīre kızı Esma’ya ve zevce-i uhrâsından mütevellid sulbî kebîr oğlu Mehmed Ârif’e münhasıra ve mesele-i mîrâsları kırk sehm i‘tibârıyla beş sehmi zevcesi mezbûre Ümmügülsüm Hatun’a ve on dörder sehmden cem‘an yirmi sekiz sehmi oğulları mezbûrân Ahmed ve Mehmed Ârif’e ve yedi sehmi kızı sagīre-i mezbûre Esma’ya isâbeti lede’ş-şer‘i’l-enver zâhir ve mütehakkık oldukdan sonra mezbûr Mehmed Ârif asâleten ve zâtı ta‘rîf-i şer‘î ile mu‘arrefe olan mezbûre Ümmügülsüm Hatun kendi nefsinden asâleten ve sagīrân-ı mezbûrânın vâlideleri ve tesviye-i umûrlarını rü’yete kıbel-i şer‘den mansûbe vasîleri olmağla vesâyeten meclis-i şer‘-i şerîf-i enverde tereke-i müteveffâ-yı mezbûra bi’l-emâne vâzı‘ü’l-yed olan Ser-bevvâbîn-i Dergâh-ı Âlî umdetü’l-emâcid ve’l-a‘yân bâ‘isü hâze’l-kitâbi’l-müstetâb Abdi Beyefendi b. el-merhûm Hüsnü Hüseyin Paşa tarafından ber-vech-i âtî tasdîka vekîl olduğu nehc-i şer‘î ve tarîk-i mer‘î üzere sâbit olan el-Hâc Eyüb Ağa b. Ömer nâm kimesne mahzarında herbiri bi’l-asâle ve bi’l-vesâye ikrâr ve takrîr-i kelâm edip mûrisimiz müteveffâ-yı mezbûrun hîn-i vefâtında yanında mevcûd terekesi esmânından hâsıl ba‘de ihrâci’l-mesârifi’l-lâzıme sahhu’l-bâkī yüz kırk guruşuna müvekkil-i mûmâ-ileyh Abdi Beyefendi bi’l-emâne vâzı‘ü’l-yed olmağla meblağ-ı mezbûr yüz kırk guruşu müvekkil-i mûmâ-ileyh Abdi Beyefendi vekîl-i mezbûr el-Hâc Eyüb Ağa yediyle işbu meclis[de] bize def‘ ü teslîm eyledikde biz dahi ber-vech-i muharrer bi’l-asâle ve bi’l-vesâye bi-kadri’l-hısas yedinden tamamen ahz ü kabz edip mûrisimiz müteveffâ-yı mezbûrun kalîl ve kesîr ve celîl ve hakīr bi’l-cümle ism-i mâl ıtlâk olunur mecmû‘-ı terekesine ve hukūk-ı mîrâsa müte‘allika âmme-i de‘âvî ve kâffe-i mütâlebâtdan müvekkil-i mûmâ-ileyh Abdi Beyefendi ile işbu vekîl-i mezbûr el-Hâc Eyyûb Ağa’dan herbirinin zimmetlerini bi’l-asâle ibrâ ve ıskāt eylediğimizde onlar dahi ber-minvâl-i muharrer ibrâ-yı mezkûru kabûl eylediler dediklerinde gıbbe’t-tasdîki’ş-şer‘î mâ-vaka‘a. Fî-selhi Muharremi’l-harâm sene 1197 Şühûdü’l-hâl: Selim Ağa b. Abdullah, Bostânî Ali Ağa b. Hüseyin, el-Hâc Osman Efendi b. el-Hâc Salih Efendi, Molla Ali b. Halil, Hacı Hasan b. Osman.