Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 215 Hüküm no: 194 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mahmud’un küçük kızı Nefise’yi bakımı karşılığında Âkıle Hanım’a kiralaması Îcâr ve istîcâr Havâss-ı Refî‘a kazâsına tâbi‘ Çekmece-i Sagīr’de sâkin Nefise nâm sagīrenin babası ve velîsi es-Seyyid Mustafa b. es-Seyyid Mahmud nâm kimesne meclis-i şer‘-i şerîf-i enverde işbu bâ‘isetü’l-kitâb Âkıle Hanım bt. Mustafa’nın zevci ve tarafından vech-i âtî üzere tasdîka vekîl olduğu ber-nehc-i şer‘î sâbit olan el-Hâc Yakub Ağa b. Ahmed nâm kimesne mahzarında bi’l-velâye ikrâr ve takrîr-i kelâm edip kızım sagīre-i mezbûrenin kendüyü infâk eder mâlı olmayıp benim dahi infâk ve iksâya iktidârım olmamağla kızım sagīre-i mezbûre ücret ile âhara îcâr ve ücreti nafaka ve kisvesine harc u sarf olunmak hakkında evlâ ve enfa‘ olmağla kızım sagīre-i mezbûreyi târih-i kitâbdan küllü yevm dörder para ücret tesmiyesiyle müvekkile-i mezbûre Âkıle Hanım’a bi’l-velâye îcâr ve teslîm ve ücret-i mezkûresini kızım sagīre-i mezbûrenin nafaka ve kisvesine harc ü sarfa müvekkile-i mezbûre Âkıle Hanım’a emr ve tarafımdan tevkîl eylediğimde ol dahi ber-minvâl-i muharrer istîcâr ve tesellüm ve kabûl ve ücret-i mezkûresini kızım sagīre-i mezbûrenin nafaka ve kisvesine harc ü sarfa ta‘ahhüd eyledi dediğini vekîl-i mezbûr el-Hâc Yakub Ağa tahkīk ve tasdîk etmeğin mâ-vaka‘a. Fî 4 Saferi’l-hayr [sene 1197] Şühûdü’l-hâl: Kasım Ağa b. Mehmed, Osman Beşe b. Osman, Ahmed Odabaşı, Molla Ali b. Halil, Hacı Hasan b. Osman.