Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 214 Hüküm no: 193 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun Yusuf mahallesinden Hadice bt. İbrahim’in bakmakta olduğu küçük kızı için eski kocasından nafaka alması Nafaka-i sagīr Mahmiye-i İslâmbol’da Uzun Yusuf mahallesinde sâkine ve zâtı ta‘rîf-i şer‘î ile mu‘arrefe olan işbu bâ‘isetü’l-vesîka Hadice bt. İbrahim nâm hatun meclis-i şer‘-i şerîf-i enverde zevc-i mutallıkı İbrahim b. Hüseyin nâm kimesne mahzarında takrîr-i kelâm ve ifâde-i merâm edip zevc-i mutallıkım mezbûr İbrahim’in firâşından hâsıla ve benden mütevellide ve bi-hakkı’l-hıdâne hacr u terbiyemde olan sadriye kızım Âişe nâm sagīrenin mâlı olmayıp nafaka ve kisveye muhtâce olmağla kızım sagīre-i mezbûrenin nafaka ve kisve-bahâsı içün babası mezbûr üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi ber-vech-i muharrer sagīre-i mezbûrenin nafaka ve kisve-bahâsı içün babası mezbûr İbrahim üzerine bi’t-terâzî târih-i kitâbdan küllü yevm sekizer akçe farz ve takdîr edip meblağ-ı mefrûz-ı mezkûru sagīre-i mezbûrenin nafaka ve kisvesine harc ü sarfa ve lede’l-iktizâ istidâneye ve inde’z-zafer babası mezbûr İbrahim üzerine rücû‘a mezbûre Hadice Hatun’a izin vermeğin mâ-vaka‘a. Fî 3 S sene 1197 Şühûdü’l-hâl: Molla Ali b. Halil, Hacı Hasan b. Osman, Mustafa b. Mustafa, Ali Ağa b. Mehmed.