Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 216 Hüküm no: 196 Orijinal metin no: [28b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağ İlyas mahallesinden Hadice bt. Ahmed’in ev arsası hissesini oğlu Mehmed Sadık ile hanımı Emine’ye satması Arsa mübâya‘ası Mahmiye-i İslâmbol’da Yedikule Kapısı dâhilinde Debbâğ el-Hâc İlyas mahallesinde sâkine Hadice bt. el-Hâc Ahmed nâm hatun tarafından vech-i âtî üzere ikrâra vekîl olduğu zât-ı mezbûreyi ârifân Hüseyin Ağa b. Hüseyin ve Abdurrahim b. İsmail nâm kimesneler şehâdetleriyle sâbit olan kule-i mezbûr kethudâsı el-Hâc Ali Ağa b. el-Hâc Mehmed meclis-i şer‘-i şerîf-i enverde müvekkile-i mezbûrenin sadrî kebîr oğlu işbu bâ‘iseyü’l-kitâb kendi nefsinden asîl ve zevcesi Emine bt. Abdullah nâm hatun tarafından vech-i âtî üzere tasdîka vekîl olduğu ber-nehc-i şer‘î sâbit olan Mehmed Sadık Ağa b. Feyzullah nâm kimesne mahzarında bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafdan İsmail Efendi veresesi arsası ve bir tarafdan Debbâğ el-Hâc Ahmed arsası ve bir tarafdan müvekkilem mezbûrenin âhar vakıf arsası ve bir tarafdan tarîk-i hâs ile mahdûd derûnunda bir bi’r-i mâ ve sâir enkāz-ı mevcûde-i ma‘lûmeyi hâvî bir bâb muhterik mülk menzil arsasının nısfı Cemile bt. Abdullah nâm hatunun bâ-hüccet-i şer‘iye şirâen yedinde mülkü ve nısf-ı âharı dahi müvekkilem mezbûrenin kezâlik bâ-hüccet-i şer‘iye şirâen yedinde mülkü olmağla müvekkilem mezbûre Hadice Hatun arsa-i mahdûde-i mezkûrede ber-vech-i muharrer mâlike olduğu nısf-ı şâyi‘asını tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mehmed Sadık Ağa ile zevcesi müvekkile-i mezbûre Emine Hatun’a ale’l-iştirâki’s-seviyy elli guruşa bey‘ ve temlik ve teslîm eylediğinde onlar dahi ber-vech-i muharrer iştirâ ve temellük ve tesellüm ve kabûl eylediklerinden sonra semeni olan meblağ-ı mezbûr elli guruş mütâlebesinden müvekkilem mezbûre Hadice Hatun oğlu mezbûr Mehmed Sadık Ağa ile zevcesi müvekkile-i mezbûre Emine Hatun’un zimmetlerini ibrâ ve ıskāt eylediğinde onlar dahi ibrâ-yı mezkûru kabûl eylediler, ba‘de’l-yevm arsa-i mahdûde-i mezkûrenin nısf-ı şâyi‘i mezbûr Mehmed Sadık Ağa ile zevcesi müvekkile-i mezbûre Emine Hatun’un ale’l-iştirâki’s-seviyy mülk-i müşterâları ve hakk-ı sarfları olup müvekkilem mezbûre Hadice Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î. Fî 6 S sene 1197 Şühûdü’l-hâl: Ali Beşe b. Osman, Mustafa b. İsmail, Osman b. Abdullah, Ahmed Ağa b. Mehmed, Molla Ali b. Halil, Abdurrahim b. İsmail, Hüseyin Ağa b. Hüseyin.