Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 217 Hüküm no: 197 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çavuş mahallesinden Şerife Fatma Hatun’un kendisini boşayan kocasından alacaklarını alarak zimmetini ibra etmesi Tatlîk ve ibrâ Mahmiye-i İslâmbol’da İbrahim Çavuş mahallesinde sâkine ve zâtı vech-i şer‘î üzere mu‘arrefe olan Şerife Fatıma Hatun bt. es-Seyyid Mehmed meclis-i şer‘-i şerîf-i enverde zevc-i mutallıkı işbu bâ‘isü’l-kitâb Mehmed Said Beşe b. Ali nâm kimesne mahzarında ikrâr ve takrîr-i kelâm edip mezbûr Mehmed Said Beşe zevc-i dâhilim olduğu hâlde târih-i kitâbdan bir sene mukaddem beni tatlîk etmekle iki def‘a akidde müsemmâ zimmetinde ma‘kūdun-aleyh olan yirmi iki buçuk guruş hakkım ile zevciyet beynimizde kāime iken yedimden istikrâz ve kabz eylediği yüz on altı guruş ki cem‘an yüz otuz sekiz buçuk guruşu zevc-i mutallıkım Mehmed Said Beşe bana def‘ ü teslîm eyledikde ben dahi yedinden tamamen ahz ü kabz edip hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan ben zevc-i mutallıkım mezbûr Mehmed Said Beşe’nin zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a [bi’t-taleb] ketb olundu. Fi’l-yevmi’s-sâdis min-Saferi’l-hayr fî 6 sene 1197 Şühûdü’l-hâl: İsmail Ağa b. İbrahim, Hafız Hasan Efendi, Mehmed Salim Efendi b. Hüseyin, Seyyid Süleyman b. es-Seyyid Ahmed, Molla Ali b. Halil ve gayruhum.