Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 218 Hüküm no: 199 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sancakdar Hayreddin mahallesinden Şerife Hadice’nin daha önceden Habibe bt. Abdullah’tan ev satın aldığı İstihbâr-ı menzil Mahmiye-i İslâmbol’da Sancakdâr Hayreddin mahallesinde sâkine ve zâtı ta‘rîf-i şer‘î ile mu‘arrefe olan işbu bâ‘isetü’l-vesîka Şerife Hadice bt. Seyyid Mustafa nâm hatun meclis-i şer‘de ber-vech-i âtî istihbâr-ı şer‘î sudûrundan sonra udûl-ı ahrâr-ı ricâl-i Müslimînden ve mahalle-i mezbûre imâmı Mehmed Salih b. Mehmed Said ve Müezzin Molla Mehmed Emin b. el-Hâc Ali ve Hüseyin Efendi b. Ali ve Davudpaşa mahallesi sâkinlerinden Mehmed Salim Efendi b. Hüseyin Efendi nâm kimesneler li-ecli’l-ihbâr meclis-i şer‘a hâzırûn olup istihbâr olunduklarında fi’l-hakīka mârrü’z-zikr Sancakdâr Hayreddin mahallesinde vâki‘ bir tarafdan Hüseyin Efendi arsası ve bir tarafdan Şeker Ahmed Ağa bağçesi ve bir tarafdan müstahbire-i mezbûrenin tasarrufunda olan vakıf hâne arsası ve bir tarafdan tarîk-i hâs ile mahdûd fevkānî bir bâb oda ve bir sofa ve tahtânî bir bâb oda ve bir bi’r-i mâ ve bir mikdâr havluyu müştemil bir bâb mülk menzil müstahbire-i mezbûre Şerife Hadice Hatun’un bin yüz elli iki senesi Habibe bt. Abdullah nâm hatundan semen-i medfû‘ ve ma‘lûm ve makbûza müşterâ mülk-i sahîh ve hakk-ı sarîhi olmağla müstahbire-i mezbûre Şerife Hadice Hatun menzil-i mahdûd-ı mezkûra târih-i mezbûrdan beri bilâ-nizâ‘ mâlike olup menzil-i mezkûra müstahbire-i mezbûreden gayrı müstahıkk-ı âharı olduğu ma‘lûmumuz değildir deyü herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl ketb olundu. Fî 7 min-Saferi’l-hayr sene 1197 Şühûdü’l-hâl: Mehmed Salih Efendi b. Mehmed Said İmâm-ı mahalle-i mezbûr, Mehmed Salim Efendi b. Hüseyin Efendi, Molla Mehmed Emin b. el-Hâc Ali Müezzin, Molla Ali b. Halil ve gayruhum.