Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 217 Hüküm no: 198 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabacı Bayezid mahallesinden Hafize bt. İsmail’in evini Asiye bt. Ali’ye satması Menzil mübâya‘ası Mahmiye-i İslâmbol’da Arabacı Bâyezid mahallesinde sâkine Hafize bt. İsmail nâm hatunun vâlidesi ve tarafından vech-i âtî üzere ikrâra vekîl olduğu zât-ı mezbûreyi ârifân Hafız Numan Efendi b. Süleyman ve es-Seyyid Hafız Sadullah b. es-Seyyid el-Hâc Mehmed nâm kimesneler şehâdetleriyle şer‘an sâbit olan mu‘arrefetü’z-zât Hanım Hatun bt. Abdullah meclis-i şer‘-i şerîf-i enverde kezâlik zâtı ta‘rîf-i şer‘î ile mu‘arrefe olan işbu bâ‘isetü’l-vesîka Asiye bt. Ali nâm hatun mahzarında bi’l-vekâle ikrâr ve takrîr-i kelâm edip müvekkilem mezbûre Hafize Hatun’un akd-i âti’z-zikrin sudûruna değin bâ-hüccet-i şer‘iye şirâen yedinde mülkü olup mahmiye-i mezbûrede Melek Hatun mahallesinde kâin iki tarafdan Resul Çelebi ve Ahmed Ağa menzilleri ve bir tarafdan el-Hâc Ahmed Ağa menzili ve bir tarafdan tarîk-i âm ile mahdûd tahtânî bir bâb oda ve sofa ve kenîf ve bir mikdâr havluyu müştemil bir bâb mülk menzilini bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Asiye Hatun’a altmış guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr altmış guruşu müvekkilem mezbûre Hafize Hatun mezbûre Asiye Hatun yedinden tamamen ahz ü kabz eyledi, ba‘de’l-yevm menzil-i mahdûd-ı mezkûr cemî‘ müştemilâtıyla mezbûre Asiye Hatun’un mülk-i müşterâsı ve hakk-ı sarfı olup müvekkilem mezbûre Hafize Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a. Fî 7 min-Saferi’l-hayr sene 1197 Şühûdü’l-hâl: Hafız Numan Efendi b. Süleyman, Mehmed Salim Efendi b. Hüseyin, es-Seyyid Hafız Sadullah b. es-Seyyid el-Hâc Ahmed, Molla Ali b. Halil, Salih b. Halil ve gayruhum.