Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 221 Hüküm no: 203 Orijinal metin no: [29b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çekmece-i Kebir nahiyesi Anarşa köyünden Dimitri v. Tanaş’ın bağ yerini Andon v. Tohari’ye satması Bağ yeri mübâya‘ası Havâss-ı Refî‘a kazâsına muzâfe Çekmece-i Kebîr nâhiyesine tâbi‘ Anarşa karyesinde mütemekkin Dimitri v. Tanaş nâm zimmî meclis-i şer‘-i şerîf-i enverde işbu hâmilü’r-rakīm Andon v. Tohari nâm zimmî muvâcehesinde ikrâr ve takrîr-i kelâm edip yedimde mülküm olup karye-i mezbûrede vâki‘ bir tarafdan Andon zimmî bağı ve bir tarafdan Bulgar Tanaş zimmî bağı ve bir tarafdan Lanyaoğlu İstori zimmî bağı ve bir tarafdan Yörükoğlu Hüseyin Beşe tarlası ile mahdûd tahmînen bir buçuk dönüm mikdârı mülk bağ yerimi tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Andon zimmîye on beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr on beş guruşu merkūm Andon zimmî yedinden tamamen ahz ü kabz eyledim, ba‘de’l-yevm zikr olunan bağ yeri merkūm Andon zimmînin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 10 S sene 1197 Şühûdü’l-hâl: Es-Seyyid el-Hâc Mehmed Nazmi Efendi b. es-Seyyid el-Hâc Abdullah, Yörükoğlu Hüseyin Beşe, Salih b. İbrahim, Molla Ali b. Halil, Todoş v. ( ), Mitrooğlu Panayot, Andon v. Astori, Kiryazioğlu Apostol v. Panayot ve gayruhum.