Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 221 Hüküm no: 204 Orijinal metin no: [29b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerâğî Hasan mahallesinden Habibe Hatun’un amcası Osman Ağa’daki alacağını tahsil etmesi Ahz ü kabz Mahmiye-i İslâmbol’da Çerâğī Hasan mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Şerife Habibe Hatun bt. Ali meclis-i şer‘-i şerîf-i enverde ammisi işbu bâ‘isü’l-kitâb Osman Ağa b. Ali nâm kimesne mahzarında ikrâr ve takrîr-i kelâm edip benim ammim mezbûr Osman Ağa zimmetinde bâ-i‘lâm-ı şer‘î mahkûmün-bih kırk bir guruş alacak hakkımı mezbûr Osman Ağa işbu meclis-i şer‘de bana def‘ ü teslîm eyledikde ben dahi ber-vech-i muharrer yedinden tamamen ahz ü kabz edip meblağ-ı mezbûr kırk bir guruşdan ammim mezbûr Osman Ağa yed ve kıbelinde bir akçe ve bir habbe hakkım bâkī kalmamağla husûs-ı mezkûra ve sâir beynimizde cereyân eden bi’l-cümle ahz ü i‘tâ ve mu‘âmelât-ı şettâya müte‘allika âmme-i de‘âvî ve kâffe-i mutâlebâtdan ammim mezbûr Osman Ağa’nın zimmetini ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î mâ-vaka‘a. Fî 9 S sene 1197 Şühûdü’l-hâl: Molla Ali b. Halil, Hacı Hasan b. Osman, Mustafa b. Mustafa, Ali Ağa b. Mehmed ve gayruhum.