Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 231 Hüküm no: 218 Orijinal metin no: [31b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacce Hatun mahallesinden Karabet v. Todor’un kendini döven Mehmed b. Abdullah aleyhine açtığı davadan feragat etmesi Ta‘zîr ibrâsı Mahmiye-i İslâmbol’da Hacce Hatun mahallesinde mütemekkin Karabet v. Todor nâm zimmî tarafından ber-vech-i âtî ikrâra vekîl olduğu Mehmed Emin Beşe b. el-Hâc İbrahim ve Musa b. Mustafa nâm kimesneler şehâdetleriyle sâbit olan es-Seyyid Yakub b. İbrahim nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-vesîka Mehmed b. Abdullah mahzarında bi’l-vekâle ikrâr ve takrîr-i kelâm edip mezbûr Mehmed târih-i kitâbdan beş gün mukaddem mahalle-i mezbûrede vâki‘ bakkāl dükkânı önünde gavga esnâsında müvekkilim mezbûr Karabet zimmînin yüzüne ve koluna sille ve yumruk ile bi-gayrı hakk darb etmekle mûcib-i şer‘îsini müvekkilim merkūm Karabet zimmî mezbûr Mehmed’den bu esnâda taleb ve da‘vâya tesaddî etmiş idi. El-hâletü hâzihî beynlerine muslihûn tavassutuyla ber-vech-i muharrer tesaddî eylediği da‘vâ-yı mezkûresinden meccânen fâriğ olup husûs-ı mezkûra müte‘allika âmme-i de‘âvî ve kâffe-i mütâlebâtdan müvekkilim merkūm Karabet zimmî mezbûr Mehmed ile sulbî kebîr oğlu gāib ani’l-meclis diğer Mehmed’den herbirinin zimmetlerini ibrâ ve ıskāt eylediğinde onlar dahi ibrâsını kabûl eylediler dedikde gıbbe’t-tasdîki’ş-şer‘î mâ-vaka‘a. Fî 16 S sene 1197 Şühûdü’l-hâl: Mehmed Emin Beşe b. el-Hâc İbrahim, Musa b. Mustafa, Molla Ali b. Halil, Salih b. Halil, Hacı Hasan b. Osman.