Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 230 Hüküm no: 217 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Denizabdal mahallesinden Rukiye bt. Ali’nin Ayşe bt. Abdi’ye bazı eşyalarını hibe etmesi ve bazılarını da satması Eşyâ mübâya‘ası Mahmiye-i İslâmbol’da Deniz Abdal mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Rukiye bt. Ali nâm hatun meclis-i şer‘-i şerîf-i enverde işbu bâ‘isetü’l-vesîka Âişe bt. Abdi nâm hatunun sadrî kebîr oğlu ve tarafından ber-vech-i âtî tasdîka vekîl olduğu nehc-i şer‘î ve tarîk-i mer‘î üzere sâbit olan Numan b. Abdülbâki nâm kimesne mahzarında ikrâr ve takrîr-i kelâm edip yedimde mâlım ve mülküm olan altı miskāl bir çift altın kuşak ve on miskāl bir çift altın bilezik ve pirûze taşlı bir altın yüzük ve bir altın hâtem yüzük ve bir İslâmbol zer-i mahbûbu ma‘a nısfiye ve zümrüd taşlı bir çift küpemi hibe-i sahîha-i şer‘iye ile müvekkile-i mezbûre Âişe Hatun’a hibe ve temlik ve teslîm eylediğimde ol dahi ber-vech-i muharrer meclis-i hibede bilâ-mâni‘ ittihâb ve temellük ve tesellüm ve kabz u kabûl eyledikden sonra eşyâ-i sâiremden yün memlû üç yemeni yasdık ve bir minder ve bir yemeni yorgan ma‘a çârşeb ve bir şilte ve bir çârşeb ve iki sahan ve bir tencere ve bir âbdest ibriğimi dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile müvekkile-i mezbûre Âişe Hatun’a on guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr on guruş mutâlebesinden müvekkile-i mezbûrenin zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm zikr olunan hulîler müvekkile-i mezbûre Âişe Hatun’un mülk-i mevhûbesi ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î. Fî 16 S sene 1197 Şühûdü’l-hâl: Hafız Mehmed Efendi İmâm-ı mahalle-i mezbûre, Müezzin Mehmed Efendi, el-Hâc Mehmed b. Mustafa, es-Seyyid Ali b. Ahmed, es-Seyyid İbrahim b. Ebîbekir, Hasan Efendi b. el-Hâc Mustafa, Fenârî Hasan Efendi b. Mehmed, Derviş Mustafa b. Abdullah, es-Seyyid Mustafa Râşid b. Ahmed, Molla Ali b. Halil ve gayruhum.