Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 233 Hüküm no: 222 Orijinal metin no: [32a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin mahallesinden Nedelko’nun oğulları Yuvan ve Naum’un alacaklı oldukları Mehmed’in oğulları Ahmed ve Hüseyin Efendilerle sulh olmaları Sulh ve ibrâ Mahmiye-i İslâmbol’da Samatya Kapısı dâhilinde el-Hâc Hüseyin mahallesinde mütemekkinler Yuvan ve Naum veledey Nedelko nâm zimmîler meclis-i şer‘-i hatîr-i lâzımü’t-tevkīrde işbu bâ‘iseyü’l-kitâb Ahmed Efendi ve Hüseyin Efendi ibney Mehmed nâm karındaşlar mahzarlarında ikrâr ve takrîr-i kelâm [edip] arsası şehremîni olanlara senevî on beş akçe mukāta‘alı ve bi’l-cümle ebniye-i sâiresi mezbûrân Ahmed Efendi ve Hüseyin Efendi’nin bi’l-münâsafe irsen yedlerinde mülkleri olup mahalle-i mezbûrede vâki‘ bir tarafdan Kasab Ömer Ağa dükkânı ve bir tarafdan Bîkâr Hanı arsası ve iki tarafdan tarîk-i âm ile mahdûd yedi kepenk üç bâb hoşâbçı ve çorbacı ve aşçı dükkânları bundan akdem vâki‘ olan harîk-i kebîr’de muhterik oldukdan sonra dekâkin-i mezkûru müceddeden binâsı içün mezbûrân Ahmed Efendi ve Hüseyin Efendi’nin bi-şarti’r-rücû‘ emirleriyle malzemeden yedi yüz guruş masrûfumuz olmağla meblağ-ı masrûf-ı mezbûr yedi yüz guruşu mezbûrân Ahmed Efendi ve Hüseyin Efendi’nin emr-i mezkûrlarına binâen bu esnâda mezbûrândan taleb ve da‘vâya tesaddî etmişidik. El-hâletü hâzihî beynimize muslihûn tavassutuyla ber-vech-i muharrer tesaddî eylediğimiz da‘vâ-yı mezkûremizden bizi mezbûrân Ahmed Efendi ve Hüseyin Efendiyle iki yüz guruş üzerine inşâ-i akd-i sulh eylediklerinde biz dahi sulh-ı mezbûru kabûl ve bedel-i sulh olan iki yüz guruşu mezbûrân Ahmed Efendi ve Hüseyin Efendi yedlerinden tamamen ahz ü kabz edip mâ‘adâ beş yüz guruşa ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan mezbûrân Ahmed Efendi ve Hüseyin Efendi’nin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eylediğimizde onlar dahi ibrâmızı kabûl eylediler dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 17 min-Saferi’l-hayr sene 1197 Şühûdü’l-hâl: İmâm Abdullah Efendi b. İbrahim, Müezzin Seyyid Osman b. Abdurrahim, es-Seyyid Ali Ağa b. Osman Kethudâ-yı Kemhacı, el-Hâc Mustafa b. İbrahim, es-Seyyid Hacı Ömer b. Hacı Mehmed Debbâğ, Seyyid Hasan b. Ali Bekçi, Molla Süleyman b. ( ), Molla Ali b. Halil ve gayruhum.