Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 234 Hüküm no: 223 Orijinal metin no: [32a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa mahallesinden Nefise bt. Abdullah’ın ev arsasının yarısını damadı Mehmed Ağa’ya satması Nısf arsa mübâya‘ası Mahmiye-i İslâmbol’da Koca Mustafa Paşa mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Nefise bt. Abdullah nâm hatun meclis-i şer‘-i hatîrde dâmâdı işbu bâ‘isü’l-vesîka Mehmed Ağa b. Ali nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahalle-i mezbûrede vâki‘ bir tarafdan benim vakıf menzilim ve bir tarafdan Kethudâ Bey odaları ve bir tarafdan Saliha Hatun arsası ve bir tarafdan tarîk-i âm ile mahdûd bir bâb muhterik mülk menzil arsasının nısf-ı şâyi‘ini yedimde ba‘de’l-ibkā mâ‘adâ nısf-ı şâyi‘-i âharını tarafeynden îcâb ve kabûlü hâvî bey‘-i bâtt-ı sahîh-i şer‘î ile dâmâdım mezbûr Mehmed Ağa’ya yirmi beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi beş guruşu dâmâdım mezbûr Mehmed Ağa yedinden tamamen ahz ü kabz eyledim, ba‘de’l-yevm nısf arsa-i mahdûde-i mezkûre dâmâdım mezbûr Mehmed Ağa’nın mülk-i müşterâsı ve hakk-ı sarfı olup ancak nısf-ı şâyi‘inde benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 19 S sene 1197 Şühûdü’l-hâl: el-Hâc Abdullah Çavuş Ağa b. Abdullah, Ebûbekir Çavuş Ağa b. Abdullah, Ahmed Ağa b. Abdulkadir, diğer Ahmed Ağa b. Abdullah, Molla Ali b. Halil, Salih b. Halil.