Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 238 Hüküm no: 228 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskenderağa mahallesinden Rabia bt. Abdullah’ın bazı eşyalarını kocasına satması Eşyâ mübâya‘ası Mahmiye-i İslâmbol’da Şehremîni kurbünde İskender Ağa mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Rabia bt. Abdullah nâm hatun meclis-i şer‘-i şerîf-i enverde hâlâ zevci işbu bâ‘isü’l-vesîka Ali b. Abdullah nâm kimesne mahzarında ikrâr ve takrîr-i kelâm edip yedimde mâlım olan üç dirhem bir çift sîm kuşağımı hibe-i sahîha-i şer‘iye ile zevcim mezbûr Ali’ye hibe ve temlik ve teslîm ve eşyâ-i sâiremden yün memlû altı çatma yasdık ve üç minder ve üç yemeni yorgan bâ-çârşeb ve iki beylik ve bir orta keçesi ve bir kilim ve bir beledî döşek ve bir yemeni baş yasdığı ve bir seccâde ve bir çuka ferâce ve iki Şam alacası entari ve iki bez gömlek ve dört tencere bâ-kapak ve beş sahan ve dört kapak ve bir mankāl ve bir şorba tası ve bir kebîr sini ve bir lengerimi dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevcim mezbûr Ali’ye kırk guruşa bey‘ ve temlik ve teslîm ve semeni mutâlebesinden zimmetini ibrâ ve ıskāt eylediğimde ol dahi ber-vech-i muharrer ittihâb ve iştirâ ve temellük ve tesellüm ve kabz ve ibrâmı kabûl eyledi, ba‘de’l-yevm zikr olunan bir çift sîm kuşak zevcim mezbûr Ali’nin mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim aslâ alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 21 S sene 1197 Şühûdü’l-hâl: Mehmed Efendi b. Halil İmâm-ı mahalle-i mezbûre, Müezzin Molla Mustafa b. Halil, Mehmed Emin Ağa b. İbrahim, Ömer Ağa b. Mustafa, Bekçi İbrahim b. Hüseyin, Molla Ali b. Halil.