Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 238 Hüküm no: 227 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimaracem mahallesinden Şerife Fatma’nın, aleyhine alacak davası açtığı eski kocası ile sulh olması Tatlîk ve ibrâ Mahmiye-i İslâmbol’da Mi‘mâr Acem mahallesinde sâkine ve zâtı vech-i şer‘î üzere mu‘arrefe olan Şerife Fatıma bt. es-Seyyid el-Hâc Mustafa nâm hatun meclis-i şer‘-i şerîf-i enverde sâbıkā zevci işbu bâ‘isü’l-vesîka Mehmed b. Mustafa nâm kimesne mahzarında ikrâr ve takrîr-i kelâm edip mezbûr Mehmed zevc-i dâhilim olduğu hâlde târih-i kitâbdan iki buçuk sene mukaddem beni bâyinen tatlîk etmekle zimmetinde ma‘kūdun-aleyh olan yirmi guruş mehr-i müeccelim ile mukaddemâ zevciyet beynimizde kāime iken zevcim mezbûre bi-tarîki’l-emâne def‘ ve teslîm eylediğim emlâkimden bir kılıç ve bir tüfenk ve bir şeşhâne ve bir piştov ve bir heğbe ve bir eğer ve bir çuka biniş ve bir çuka entarimi ben bu esnâda taleb ve da‘vâya tesaddî etmişidim. El-hâletü hâzihî beynimize muslihûn tavassutuyla ber-vech-i muharrer tesaddî eylediğim da‘vâ-yı mezkûremden beni zevcim mezbûr Mehmed ile bir kılıç ve bir tüfenk üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan kılıç ve tüfenki zevcim mezbûr Mehmed yedinden ahz ü kabz edip mehr-i müeccel-i mezkûr yirmi guruş ile eşyâ-i muharrere-i mezkûreye ve bi’l-cümle hukūk-ı sâire müte‘allika âmme-i de‘âvî ve kâffe-i mutâlebâtdan ben zevcim mezbûr Mehmed’in zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 19 S sene 1197 Şühûdü’l-hâl: İbrahim Efendi b. Mehmed, Mumcu İbrahim b. Mehmed, Harbeci Ahmed Beşe, Molla Ali b. Halil, Salih b. Halil.