Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 242 Hüküm no: 233 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Mehmed Ağa b. Hüseyin’in vasiyeti Vasiyet bi’l-vekâle Mahmiye-i İslâmbol’da Ali Fakih mahallesinde sâkin Mehmed Ağa b. Hüseyin nâm kimesne tarafından ber-vech-i âtî vekîl olduğu Osman Efendi b. Ali ve Şerbetçi Hasan Beşe b. Süleyman nâm kimesneler şehâdetleriyle sâbit olan Saka Osman Beşe b. Hüseyin nâm kimesne meclis-i şer‘-i şerîf-i enverde işbu bâ‘isü’l-kitâb Ömer Çavuş Ağa b. Mahmud nâm kimesne mahzarında bi’l-vekâle ikrâr ve takrîr-i kelâm edip müvekkilim mezbûr Mehmed Ağa şöyle vasiyet eyledi ki ben bi-emrillâhi te‘âlâ vefât eylediğimde mezbûr Ömer Çavuş Ağa benim vasîyy-i muhtârım olup mecmû‘-ı terekemi bi’l-vesâye ahz ü kabz eyledikden sonra evvelen vech-i mesnûn üzere techîz ve tekfîn ve defnim umûruna terekemden yirmi üç guruş harc ü sarf eyleye ve hâlâ zevcem Şerife Hadice bt. Ahmed nâm hatuna zimmetinde ma‘kūdun-aleyh olan üç bin yüz akçe mehr-i müeccelini ba‘de’l-edâ bâkī kalan terekemin sülüsünü ifrâz ve sülüs-i mezbûrdan on beşe guruş ıskāt-ı salât-ı fâitem ve beş guruş kefâret-i yemîn ve savm ve sâir nüzûrâtım içün fukarâ-i Müslimîn beyninde devr ve tasadduk oluna ve yine sülüs-i mezbûrdan elli guruş ile münâsib mahâlde bir bi’r-i mâ hafr oluna ve yine sülüs-i mezbûrdan mahalle-i mezbûre câmi‘-i şerîfi minâresine revgan-ı zeyt bahâ olunmak üzere yirmi guruş verile ve sülüs-i mezbûrdan her ne fazla kalır ise vasîyy-i mezbûr dilediği vücûh-ı birre harc u sarf eyleye ve sülüsân-ı terekemin rub‘unu zevcem mezbûre Şerife Hadice Hatun ahz ü kabz eyledikden sonra bâkīsini dahi benim vilâyet-i Anadolu’da İskilip kazâsı ahâlisinden ve zî-rahm cihetinden babam müteveffânın hâli oğulları Yakub ve Ebûbekir Beşe nâm kimesnelere îsâl ve teslîm eyleye deyü vasiyet ve tenfîzine mezbûr Ömer Çavuş Ağa’yı vasîyy-i muhtâr nasb ü ta‘yîn eyledim dedi dedikde ol dahi ber-vech-i muharrer vesâyet-i mezkûreyi kabûl ve hizmet-i lâzımesin kemâ-yenbağī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 22 min-S sene 1197 Şühûdü’l-hâl: İmâm İsmail Efendi b. ( ), Müezzin Hafız Mehmed Efendi, es-Seyyid el-Hâc Ali Ağa b. es-Seyyid el-Hâc Osman, Kethudâ Hüseyin Ağa b. Hasan, es-Seyyid el-Hâc Ahmed Çavuş Ağa b. es-Seyyid Mehmed, Debbâğ Hasan Ağa b. Süleyman, Osman Efendi b. Ali, Hasan Beşe b. Süleyman, Molla Ali b. Halil, Salih b. Halil ve gayruhum.