Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 241 Hüküm no: 232 Orijinal metin no: [33b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cafer Subaşı mahallesinden Kalemtraşçı Süleyman Ağa’nın vasiyeti Vasiyet hücceti Mahmiye-i İslâmbol’da Cafer Subaşı mahallesinde sâkin Kalemtraşçı Süleyman Ağa b. Mehmed nâm kimesne meclis-i şer‘-i şerîf-i enverde Enderûn-ı Hümâyûn tabîblerinden işbu bâ‘isü’l-kitâb Mustafa Efendi b. Mehmed nâm kimesne mahzarında ikrâr-ı tam ve takrîr-i kelâm edip ben bi-emrillâhi te‘âlâ vefât eylediğimde bi’l-cümle terekem ve zimem ve eyâdî-i nâsda olan hukūkum cem‘ u tahsîl ve ahz ü kabz olunup sünnet-i seniyye üzere kadr-ı ma‘rûf yirmi beş guruş ile techîz ve tekfîn ve levâzım-ı defnim görülüp düyûn-ı müsbetem ba‘de’l-edâ bâkī kalan terekemin sülüsünü ifrâz ve sülüs-i mezkûrdan sekiz guruş ıskāt-ı salât-ı fâitem içün ve yedi guruş kefâret-i savm ve kefâret-i yemînim içün ber-nehc-i şer‘î ba‘de’d-devr fukarâ-i Müslimîne tasadduk oluna ve yine sülüs-i mezbûrdan on guruş ile iki aded seng-i mezar iştirâ olunup ber-vech-i mu‘tâd vaz‘ oluna ve câriye-i memlûkem olup hâlâ tedbîr-i mukayyede ile müdebbere eylediğim zenciye Rûşen bt. Abdullah’a sülüs-i mezkûrdan yün ile memlû iki minder ve yün memlû bir döşek ve iki yorgan ma‘a çârşeb ve kıtık memlû dört köhne çatma yasdık [34a] ve yün bir baş yasdığı ve iki başlı bir taşlı kuşak ve bir Şam alacası entari ve bir şali cübbe ve bir mükemmel hamam takımı ve bir müsta‘mel orta keçesi ve bir ağaç iskemle ve bir maşraba ve bir kahve ibriği ve bir tâbe ve bir nühâs mankāl ve bir leğen ma‘a ibrik ve iki tencere ma‘a kapak ve üç sahan ma‘a kapak ve bir şorba tası ma‘a kapak ve bir sagīr sini ile nakid yirmi beş guruş verile ve yine sülüs-i mezkûrdan şâkirdim Osman b. Numan’a on beş guruş verile ve benim aslâ ve kat‘a vâris ve vârisem olmayıp benim içün bimâ-zâde ale’s-sülüs vasiyet şer‘an câize olmağla sülüs-i mezkûrdan her ne fazla ve bâkī kalır ise sülüsân-ı terekeme zam olunup mecmû‘unu merkūm Mustafa Efendi’ye vasiyet eyledim, mûsâ-leh olmak üzere bi-hükmi’l-vasiyet kendi içün ahz ü kabz eyleye deyü vasiyet ve vesâyâ-yı mezkûremi tenfîze merkūm Mustafa Efendi’yi vasîyy-i muhtâr nasb ü ta‘yîn ve ihbâr eylediğimde ol dahi vesâyet-i mezkûreyi kabûl ve merâsimini kemâ-yenbağī edâya ta‘ahhüd ve iltizâm eyledim dedikde gıbbe’t-tasdîki’ş-şer‘î mâ-vaka‘a bi’t-taleb. Fî 18 S sene 1197 Şühûdü’l-hâl: Eş-Şeyh Ebûbekir Efendi b. İsmail, es-Seyyid İsmail Çelebi b. Molla Abdullah, Hamza Efendi b. Abdullah, Mehmed b. Osman, Ali b. Ahmed.