Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 244 Hüküm no: 235 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Mustafa’nın vefat eden kocası Samancı Mustafa b. Mehmed’in alacaklarını tahsil için Seyyid Yakub b. İbrahim’e vekalet vermesi Vekâlet Mahmiyye-i İstanbul’da Kasab İlyas mahallesinde sâkin iken bundan akdem vefât eden Samancı Mustafa b. Mehmed’in verâseti zevce-i metrûkesi Fâtıma bt. Mustafa nâm hâtûn ile sulbî sagīr oğlu Mehmed’e munhasıra oldukdan sonra zâtı vech-i şer‘î üzere mu‘arrefe olan mezbûre Fâtıma Hâtûn asâleten ve sagīr-i mezbûrun vâlidesi ve tesviye-i emrine vasiyy-i mansûbesi olmağla vesâyeten meclis-i şer‘-i şerîf-i enverde işbu bâ‘isü’l-kitâb es-Seyyid Yakub b. İbrahim nâm kimesne mahzarında bi’l-asâle ve bi’l-vesâye ikrâr ve takrîr-i kelâm edip zevcim müteveffâ-yı mezbûrun ma‘lûmu’l-esâmî kimesneler zimmetlerinde on beş guruş alacak hakkı olmağla meblağ-ı mezbûru kable’l-ahz ve’l-istîfâ zevcim mezbûr fevt ve meblağ-ı mezbûr benimle oğlum sagīr-i mezbûra mevrûs olmağın ben meblağ-ı mezbûru mahallinde taleb ve da‘vâ ve ahz u kabza ve lede’l-iktizâ sulh ve ibrâya ve makbûzunu îsâl ve teslîme ve husûs-ı mezkûr mütevakkıf olduğu umûrun küllîsine tarafımdan mezbûr es-Seyyid Yakub’u bi’l-asâle ve bi’l-vesâye vekîl ve nâib-i menâb nasb u ta‘yîn eyledim dedikde ol dahi ber-vech-i muharrer vekâlet-i mezbûreyi kabûl ve merâsimini kemâ yenbagī edâya ta‘ahhüd ve iltizâm etmeğin mâ vaka‘a bi’t-taleb [ketb olundu]. Fî 19 S. sene 1197 Şuhûdü’l-hâl: Mahmud Beşe b. Mehmed, Ömer Beşe b. Veliyyüddin, Mustafa b. Hasan, Mollâ Ali b. Halil.