Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 244 Hüküm no: 236 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah’ın kocası Mehmed b. el-Hac Halil’den boşanması Muhâla‘a Mahmiyye-i İstanbul’da Edirnekapısı dâhilinde Fâtıma Sultan mahallesinde sâkine ve zâtı vech-i şer‘î üzere mu‘arrefe olan Emine bt. Abdullah nâm zenciye meclis-i şer‘-i hatîr-i lâzimü’t-tevkīrde zevc-i dâhili işbu bâ‘isü’l-vesîka Mehmed b. el-Hâc Halil mahzarında ikrâr ve takrîr-i kelâm edip mezbûr Mehmed zevcim olup lâkin beynimizde hüsn-i mu‘âşeretimiz olmamağla ben hul‘a tâlibe olduğum ecilden zevcim mezbûrun zimmetinde mütekarrer ve ma‘kûdün-aleyh olan otuz guruş mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olup ve zevcim mezbûra mâlımdan medfû‘um olan yüz otuz para dahi bedel-i hul‘ olmak üzere zevcim mezbûr Mehmed ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyyete ve sâire müte‘allika âmme-i de‘âvî ve kâffe-i mutâlebâtdan ben zevcim mezbûr Mehmed’in zimmetini ibrâ ve ıskāt eylediğimde ol dahi kezâlik hukūk-ı zevciyyete ve sâire müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ vaka‘a. Fî 24 S. sene 1197 Şuhûdü’l-hâl: Halil Beşe b. Osman, Mollâ Ali b. Halil, Salih b. Halil, Mustafa b. Mustafa.