Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 249 Hüküm no: 243 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beyoğlu’ndan Lori bt. Tomas’ın terekesi konusunda anlaşmazlığa düşen vârislerin sulh olmaları Mîrâsdan ibrâ Mahrûse-i Galata’da Beyoğlu nâm mahâlde mütemekkine iken bundan akdem hâlike olan Lori bt. Tomas nâm Nasrâniyenin verâseti zevc-i metrûkü Mahak v. Kazer nâm zimmî ile li-ebeveyn kız karındaşları Antran ve Meled nâm Nasrâniyelere münhasıra oldukdan sonra şahsları vech-i şer‘î üzere mu‘arrefeler olan mersûmetân Antran ve Meled Nasrâniyeler meclis-i şer‘-i şerîf-i enverde tereke-i hâlike-i merkūma bi’l-verâse vâzı‘ü’l-yed olan işbu hâmilü’r-rakīm zevc-i merkūm Mahak zimmî muvâcehesinde herbiri bi’l-verâse ikrâr ve takrîr-i kelâm edip bundan akdem mûrisimiz mersûme Lori Nasrâniye eşyâ-i mütenevvi‘a-i ma‘lûme-i memlûkesini hayatında bâ-hüccet-i şer‘iye semen-i medfû‘ ve makbûz ve ma‘lûma merkūm Mahak zimmîye bey‘ ve temlik ve teslîm, ol dahi ber-vech-i muharrer iştirâ ve temellük ve tesellüm ve kabûl edip ol-vechile eşyâ-i mütenevvi‘a-i ma‘lûme merkūm Mahak zimmînin mülk-i müşterâsı oldukdan sonra merkūm Mahak zimmî mûrisimiz hâlike-i mersûmenin hâric ez-hüccet terekesini ketm u ihfâ etmiş idi deyü bu esnâda merkūm Mahak zimmîden hisse-i irsiyemizi taleb ve da‘vâya tesaddî etmişidik. El-hâletü hâzihî beynimize muslihûn tavassutuyla ber-vech-i muharrer tesaddî eylediğimiz da‘vâdan bizi merkūm Mahak zimmî ile yetmiş guruş üzerine inşâ-i akd-i sulh eylediklerinde biz dahi sulh-ı mezkûru kabûl ve bedel-i sulh olan meblağ-ı mezbûr yetmiş guruşu merkūm Mahak zimmî yedinden bi’l-münâsafa tamamen ahz ü kabz edip mûrisimiz hâlike-i mersûmenin dâhil-i hüccet ve hâric ez-hüccet terekesine ve hukūk-ı mîrâsa müte‘allika âmme-i de‘âvî ve kâffe-i mütâlebâtdan merkūm Mahak zimmînin zimmetini ibrâ ve ıskāt eylediğimizde ol dahi ibrâmızı kabûl eyledi dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 15 min-Saferi’l-hayr sene 1197 Şühûdü’l-hâl: Molla Ali b. Halil, Salih b. Halil, Hacı Hasan b. Osman, Minas v. Abraham, Karabet v. Domanik, Nikagos v. Haçador ve gayruhum.