Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 248 Hüküm no: 242 Orijinal metin no: [35a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Raziye Hatun bt. Bektaş’ın kocası Mehmed Beşe b. Osman’a mehrini hibe etmesi ve bir takım eşyalarını da satması Eşyâ mübâya‘ası Mahmiyye-i İstanbul’da Koca Mustafa Paşa kurbunda Ca[nba]ziye mahallesinde sâkine ve zâtı ta‘rîf-i şer‘î ile mu‘arrefe olan Raziye Hâtûn bt. Bektaş meclis-i şer‘-i şerîf-i enverde hâlâ zevci işbu bâ‘isü’l-kitâb Mehmed Beşe b. Osman nâm kimesne mahzarında ikrâr ve takrîr-i kelâm edip zevcim mezbûr zimmetinde mütekarrer ve ma‘kûdün-aleyh olan iki bin akçe mehr-i müeccelimi hibetü’d-deyn mimmen aleyhi’d-deyn sahîhatün fehvâsınca zevcim mezbûr Mehmed Beşe’ye hibe ve temlîk eylediğimde ol dahi meclis-i hibede bilâ-mâni‘ ittihâb ve temellük ve kabûl eyledikden sonra eşyâ-i memlûkemden bir sagīr minder ve yün memlû dört beledî yasdık ve bir baş yasdığı ve bir çit yorgan bâ-çarşeb ve bir müsta‘mel çuka ve bir yaşmak ma‘a makrame ve iki tencere bâ-kapak ve dört sahan ve bir leğen ma‘a ibrik ve bir sini ve bir kahve ibriği ve bir tâbemi dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevcim mezbûr Mehmed Beşe’ye on beş guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr on beş guruş mutâlebesinden dahi zevcim mezbûrun zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm mehr-i mezkûr iki bin akçeden zevcim mezbûr Mehmed Beşe’nin zimmeti berî ve eşyâ-i muharrere-i mezkûre dahi mülk-i müşterâsı ve hakk-ı sırfı olup benim kat‘â alâka ve medhalim kalmamışdır dedikde gıbbe’t-tasdîki’ş-şer‘î. Fî 26 S. sene 1197 Şuhûdü’l-hâl: Ömer b. Ali, Mehmed Emin b. el-Hâc Hüseyin, Mahmud b. Murad, es-Seyyid Ali b. İsa, Ali b. Hamza, Mollâ Ali b. Halil.