Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 250 Hüküm no: 245 Orijinal metin no: [35b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeğen Ali Çavuş’un oğulları Ali Efendi ve Mustafa Ağa’nın, kendilerine Silahdar Ocağı Kethudası Süleyman Çavuş’tan miras kalan ev arsalarını Ali Çavuş’a satmaları Arsa mübâya‘ası Mahmiye-i İslâmbol’da Koca Mustafa Paşa mahallesinde sâkin iken bundan akdem vefât eden sâbıkā Silahdâr Ocağı Kethudâsı el-Hâc Süleyman Çavuş Ağa b. Abdullah nâm kimesnenin verâseti min-ciheti’l-usûbeti’n-nesebiyye kendüyü i‘tâk eden el-Hâc Mustafa b. Musli nâm kimesnenin er karındaşı oğlunun oğulları Ali Efendi [ve] Mustafa Ağa ibney Yeğen Ali Çavuş Ağa nâm kimesnelere ve terekesi bi’l-münâsafa mezbûrâna isâbeti tahakkukundan sonra mezbûrân Ali Efendi ve Mustafa Ağa meclis-i şer‘-i şerîf-i enverde işbu bâ‘isü’l-vesîka el-Hâc Ali Çavuş Ağa b. İbrahim nâm kimesne tarafından vech-i âtî üzere tasdîka vekîl olduğu ber-nehc-i şer‘î sâbit olan Mehmed Necib Efendi b. Mehmed mahzarında ikrâr ve takrîr-i kelâm edip mahmiye-i mezbûrede Davudpaşa mahallesinde kâin Ebûbekir Paşa câmi‘-i şerîfi kurbünde vâki‘ bir tarafdan ba‘zan Bağcızâde es-Seyyid Mehmed ve Mustafa arsaları ve ba‘zan Haffâf Ali ve zevcesi Rukiye hatun menzilleri ve bir tarafdan ba‘zan müşterî-i mezbûrun tasarrufunda olan vakıf bağçe ve ba‘zan İbrahim Çavuş menzili ve bir tarafdan Salih Efendi menzili ve bir tarafdan tarîk-i hâs ile mahdûd bir bâb muhterik mülk menzil arsası mûrisimiz mezbûr el-Hâc Süleyman Çavuş Ağa’nın hayatında ile’l-vefât yedinde mülkü olup ba‘de vefâtihî arsa-i mahdûde-i mezkûre bize mevrûs olmağın biz arsa-i mahdûde-i mezkûreyi tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkil-i mezbûr el-Hâc Ali Çavuş Ağa’ya dört yüz guruşa bey‘ ve temlik ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr dört yüz guruşu müvekkil-i mezbûr el-Hâc Ali Çavuş Ağa yedinden bi’l-münâsafa tamamen ahz ü kabz eyledik, ba‘de’l-yevm arsa-i mahdûde-i mezkûre müvekkil-i mezbûr Ali Çavuş Ağa’nın mülk-i müşterâsı ve hakk-ı sarfı olup bizim kat‘a alâka ve medhalimiz kalmamışdır dediklerinde gıbbe’t-tasdîki’ş-şer‘î mâ-vaka‘a. Fî 24 S sene 1197 Şühûdü’l-hâl: Abdullah Efendi b. Abdullah Hatîb, Hasan Çavuş Ağa b. Mehmed, Molla Hasan b. Hüseyin, Alemdâr Ahmed Ağa b. Musa, es-Seyyid Osman b. Ali, Mehmed Beşe b. Mehmed, Molla Ali b. Halil, Salih b. Halil.