Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 251 Hüküm no: 246 Orijinal metin no: [35b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Denizabdal mahallesi müezzini Mehmed Efendi’nin Ereğli mahallesindeki evini İbrahim Ağa’ya satması Menzil mübâya‘ası Mahmiye-i İslâmbol’da Deniz Abdal mahallesinde sâkin ve mahalle-i mezbûre müezzini Mehmed Efendi b. Ali meclis-i şer‘-i şerîf-i enverde işbu bâ‘isü’l-vesîka İbrahim Ağa b. Mehmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahmiye-i mezbûrede Ereğli mahallesinde vâki‘ bir tarafdan Said Efendi menzili ve bir tarafdan Hadice Hatun menzili ve iki tarafdan tarîk-i âm ile mahdûd tahtânî bir bâb oda ve matbah ve bi’r-i mâ ve bir mikdâr havluyu müştemil bir bâb mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr İbrahim Ağa’ya yüz otuz beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz otuz beş guruşu mezbûr İbrahim Ağa yedinden tamamen ahz ü kabz eyledim, ba‘de’l-yevm menzil-i mahdûd-ı mezkûr cemî‘ müştemilâtıyla mezbûr İbrahim Ağa’nın mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 28 S sene 1197 Şühûdü’l-hâl: Mehmed Salim Efendi b. Hüseyin Efendi, el-Hâc Ali b. Mehmed, Mehmed b. Mehmed, Hüseyin b. Osman, Hasan b. Osman, Molla Ali b. Halil ve gayruhum.