Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 252 Hüküm no: 247 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuti Latif mahallesinden Molla Mehmed’in alacaklı olduğu iddiasıyla açtığı davadan men edilmesi Mübâya‘ayı isbât Mahmiye-i İslâmbol’da Tûtî Latif mahallesinde sâkin Molla Mehmed b. Mustafa nâm kimesne meclis-i şer‘-i şerîf-i enverde işbu bâ‘isü’l-vesîka es-Seyyid Hüseyin b. es-Seyyid Ali nâm kimesne mahzarında üzerine da‘vâ ve takrîr-i kelâm edip mezbûr es-Seyyid Hüseyin’in babası olup bundan akdem vilâyet-i Anadolu’da Nevşehir kazâsına tâbi‘ Ürgüb kasabasında vefât eden mezbûr es-Seyyid Ali b. es-Seyyid Osman zimmetinde cihet-i karzdan beş guruş alacak hakkım olmağla meblağ-ı mezbûru kable’l-ahz ve’l-istifâ mezbûr es-Seyyid Ali fevt ve terekesinden olup mârrü’z-zikr Ürgüb kasabasında İyici nâm mahâlde vâki‘ bir tarafdan İsmail Beşe bağı ve bir tarafdan Demircioğlu Hacı İbrahim bağı ve bir tarafdan cebel ve bir tarafdan tarîk-i âm ile mahdûd yirmi ırgadlık kürûmu mülk bir kıt‘a bağına oğlu mezbûr es-Seyyid Hüseyin bi’l-verâse vâzı‘ü’l-yed olmağla meblağ-ı mezbûr beş guruşu tereke-yi müteveffâ-yı mezbûrdan olmak üzere mezbûr es-Seyyid Hüseyin’den hâlâ taleb ederim, suâl olunup alıverilmesi matlûbumdur dedikde gıbbe’l-istintâk mezbûr es-Seyyid Hüseyin cevâbında babası mezbûrun mezbûr Molla Mehmed’e cihet-i merkūmeden beş guruş deyni olduğunu ikrâr lâkin babam mezbûr es-Seyyid Ali bağ-ı mahdûd-ı mezkûru hâl-i hayatında ve kemâl-i akl-ı sıhhatinde bin yüz seksen yedi senesi Ramazani’l-mübârekinin yirmi sekizinci günü iki yüz guruş semen-i medfû‘ ve makbûza bana bâtten bey‘ ve temlik ve mahâllinde kabza taslît eylediğinde ben dahi ber-vech-i muharrer iştirâ ve temellük ve kabûl edip ol-vechile bağ-ı mahdûd-ı mezkûr târih-i mezbûrdan beri mülk-i müşterâm olmuşdur deyü ba‘de’d-def‘ ve’l-inkâr mezbûr es-Seyyid Hüseyin’den ber-vech-i muharrer def‘-i meşrûhunu mübeyyin beyyine taleb olundukda udûl-ı ahrâr-ı ricâl-i Müslimînden Ahmed Beşe b. Abdullah ve es-Seyyid Mehmed Memiş b. Hüseyin nâm kimesneler li-ecli’l-istişhâd meclis-i şer‘a hâzırân olup istişhâd olunduklarında fi’l-vâki‘ vilâyet-i Anadolu’da Nevşehir kazâsına tâbi‘ Ürgüb kasabasında İyici nâm mahâlde vâki‘ bir tarafdan İsmail Beşe bağı ve bir tarafdan Demircioğlu Hacı İbrahim bağı ve bir tarafdan cebel ve bir tarafdan tarîk-i âm ile mahdûd yirmi ırgadlık mikdârı kürûmu mülk bir kıt‘a bağını bundan akdem kasaba-i mezbûrede vefât eden es-Seyyid Ali b. es-Seyyid Osman hâl-i hayatında ve kemâl-i akl-ı sıhhatinde bin yüz seksen yedi senesi Ramazani’l-mübârekinin yirmi sekizinci günü iki yüz guruş semen-i medfû‘ ve makbûza işbu mezbûr es-Seyyid Hüseyin’e bâtten bey‘ ve temlik ve mahâllinde kabza taslît eylediğinde ol dahi ber-vech-i muharrer iştirâ ve temellük ve kabûl edip ol-vechile bağ-ı mahdûd-ı mezkûr târih-i mezbûrdan beri mezbûr es-Seyyid Hüseyin’in mülk-i müşterâsı ve hakk-ı sarfı olmuşdur, biz bu husûsa bu vech üzere şâhidleriz, şehâdet dahi ederiz deyü herbiri meclis-i şer‘de mezbûr Molla Mehmed muvâcehesinde edâ-i şehâdet-i şer‘iye etdiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince müdde‘î-i mezbûr Molla Mehmed meblağ-ı mezbûr beş guruş mütâlebesiyle mezbûr es-Seyyid Hüseyin’e bî-vech mu‘ârazadan men‘ birle mâ-vaka‘a bi’t-taleb. Fî 26 S sene 1197 Şühûdü’l-hâl: Osman b. Mustafa, Deli Hüseyin oğlu Mustafa, es-Seyyid Mehmed Memiş b. Hüseyin, Küçük İbrahim Yazıcı, Alemdâr Memiş b. ( ).