Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 255 Hüküm no: 251 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskenderağa mahallesinden Bektaş b. Yusuf’un Hafız Ahmed’e bir miktar parasını hibe etmesi ve bazı eşyalarını da satması Eşyâ mübâya‘ası Mahmiye-i İslâmbol’da İskender Ağa mahallesinde sâkine Bektaş b. Yusuf nâm kimesne tarafından ber-vech-i âtî ikrâra vekîl olduğu Mustafa b. Ahmed ve es-Seyyid Mehmed Odabaşı b. Abdullah nâm kimesneler şehâdetleriyle sâbit olan mahalle-i mezbûre imâmı Mehmed Efendi b. Halil meclis-i şer‘-i hatîrde işbu bâ‘isü’l-vesîka Hafız Ahmed b. Mustafa mahzarında bi’l-vekâle ikrâr ve takrîr-i kelâm edip müvekkilim mezbûr Bektaş yedinde mâlı ve mülkü olan otuz dört guruş nukūdunu hibe-i sahîha-i şer‘iye ile mezbûr Hafız Ahmed’e hibe ve temlik ve teslîm ve eşyâ-i sâiresinden yün memlû üç beledî yasdık ve iki minder ve üç yorgan bâ-çârşeb ve alaca iki entari ve bir bez gömlek ma‘a don ve bir destâr ve bir köhne aba ve bir top kefenlik bez ve bir tencere bâ-kapak ve üç sahan ve bir tâbe ve bir kazgan ve bir leğen ma‘a ibrik ve bir kahve ibriği ve bir pirinç şamdan ve bir tahta sandığını dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr Hafız Ahmed’e yirmi guruşa bey‘ ve temlik ve teslîm eylediğinde ol dahi ber-vech-i muharrer ittihâb ve iştirâ ve temellük ve tesellüm ve kabz u kabûl eyledikden sonra semeni olan meblağ-ı mezbûr yirmi guruş mütâlebesinden müvekkilim mezbûr Bektaş mezbûr Hafız Ahmed’in zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm nakd-i merkūm otuz dört guruş mezbûr Hafız Ahmed’in mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup müvekkilim mezbûr Bektaş’ın kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a. Fî 28 S sene 1197 Şühûdü’l-hâl: Es-Seyyid Mehmed Odabaşı b. Abdullah, Mustafa b. Ahmed, es-Seyyid İbrahim Odabaşı b. Mehmed, Molla Halil b. Resul, es-Seyyid Yusuf b. İbrahim, Receb Beşe b. Ali, İbrahim b. Ali, Molla Ali b. Halil.