Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 256 Hüküm no: 252 Orijinal metin no: [36b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Zahide bt. İsmail’in kocasından boşanması Muhâla‘a Mahmiye-i İslâmbol’da Ali Fakih mahallesinde sâkine ve zâtı vech-i şer‘î üzere mu‘arrefe olan Zahide bt. İsmail nâm hatun meclis-i şer‘-i hatîr-i lâzımü’t-tevkīrde zevc-i dâhili işbu râfi‘ü’l-vesîka es-Seyyid Abdullah Ağa b. Hamza nâm kimesne mahzarında ikrâr ve takrîr-i kelâm edip mezbûr es-Seyyid Abdullah Ağa zevcim olup lâkin beynimizde hüsn-i zindegânemiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan altmış beş guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcimi mezbûr es-Seyyid Abdullah Ağa ile muhâla‘a-i sahîha-i şer‘iye ile hul‘ [olduğumda] ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan ben zevcim mezbûr es-Seyyid Abdullah Ağa’nın zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i da‘vâdan benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 29 S sene 1197 Şühûdü’l-hâl: Haseki İbrahim b. Ahmed, Hafız Mehmed Efendi, Ali Ağa b. Cafer, Molla Ali b. Halil, Salih b. Halil, Hüseyin Efendi b. İbrahim Efendi.