Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 259 Hüküm no: 257 Orijinal metin no: [37a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerâğî Hasan mahallesinden Serope v. Zakarya’nın bazı eşyalarını hanımı Sima’ya satması ve bedelini de borcuna takas etmesi Eşyâ mübâya‘ası ve semenini deyne takas Kezâlik bi’l-vekâle ikrâr ve takrîr-i kelâm edip müvekkilim merkūm Serope zimmî yedinde mâlı olan bir pandül altın sâ‘atini hibe-i sahîha-i şer‘iye ile zevcesi mersûme Sima Nasrâniyeye hibe ve temlik ve teslîm ve eşyâ-i sâiresinden üç yüz cehre ipek ve otluk memlû üç çatma yasdık ve iki minder ve bir beledî döşek ve bir yemeni yorgan bâ-çârşeb ve iki alaca çârşeb ve iki baş yasdığı ve bir Mısır hasırı ve iki tencere bâ-kapak ve sekiz sahan ve bir tas bâ-kapak ve bir fener ve bir sini ve bir tepsi ve bir tâbe ve bir leğen ma‘a ibrik ve bir kebîr leğen ve bir câmeşûy tenceresi ve iki şamdan ve iki kahve ibriği ve bir keremsûd kaplı su semmûru kürk ve bir çuka dolama ve bir keremsûd celâlî ve bir çuka biniş ve bir çakşır ve dört bez gömlek ve iki tahta sandığını dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevcesi mersûme Sima Nasrâniyeye yedi yüz guruşa bey‘ ve temlik ve teslîm eylediğinde ol dahi ber-vech-i muharrer ittihâb ve iştirâ ve temellük ve tesellüm ve kabz u kabûl eyledikden sonra semeni olan meblağ-ı mezbûr yedi yüz guruşu müvekkilim merkūmun zevcesi Sima Nasrâniye zimmetinde vâcibü’l-edâ deyni olan bin guruşun yedi yüz guruşuna takas ve mahsûb eylediğinde ol dahi mukāssa ve kabûl eyledi, ba‘de’l-yevm deyn-i mezkûr bin guruşun yedi yüz guruşundan müvekkilim merkūm Serope zimmînin zimmeti berî ve zikr olunan altın sâ‘at mersûme Sima Nasrâniyenin mülk-i mevhûbesi ve eşyâ-i muharrere-i mezkûre dahi mülk-i müşterâsı ve hakk-ı sarfı olup müvekkilim merkūm Serope zimmînin aslâ alâka ve medhali kalmayıp ve müvekkilim merkūm Serope zimmînin zevcesi mersûme Sima Nasrâniyeye zimmetinde üç yüz guruş deyni bâkī kalmışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 28 S sene 1197 Şühûdü’l-hâl: Şâhidûn-ı sâbıkūn.