Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 258 Hüküm no: 256 Orijinal metin no: [37a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerâğî Hasan mahallesinden Serope v. Zakarya’nın vasiyeti ve hanımı Sima’yı vasi tayin etmesi Vasiyet-i kefere Mahmiye-i İslâmbol’da Çerâğī Hasan mahallesinde mütemekkin Serope v. Zakarya nâm zimmî tarafından ber-vech-i âtî ikrâra vekîl olduğu Müezzin Ahmed Efendi b. Mehmed ve Kemhacı Ahmed Ağa b. Mustafa nâm kimesneler şehâdetleriyle sâbit olan mahalle-i mezbûre imâmı Abdullah Efendi b. İbrahim meclis-i şer‘-i şerîf-i enverde müvekkil-i merkūmun hâlâ zevcesi mu‘arrefetü’ş-şahs işbu hâmiletü’r-rakīm Sima bt. İsail nâm Nasrâniye muvâcehesinde bi’l-vekâle ikrâr ve takrîr-i kelâm edip müvekkilim merkūm Serope zimmî şöyle vasiyet eyledi ki ben bi-emrillâhi te‘âlâ hâlik olduğumda zevcem mersûme benim vasîyy-i muhtârım olup bi’l-cümle terekemi ahz ü kabz ve lâşemi zîr-i hâke ilkā eyledikden sonra terekemin sülüsünü ifrâz ve sülüs-i mezbûrdan Çiçil bt. Manas nâm Nasrâniyeye iki yüz guruş ve Artin v. Kirkor nâm sagīre dahi yüz elli guruş ki cem‘an üç yüz elli guruş verile ve sülüs-i mezbûrdan her ne fazla kalır ise zevcem mersûme dilediği yere harc ü sarf eyleye ve sülüsân-ı terekemi dahi zevcem mersûme ile li-ebeveyn kız karındaşım Lori Nasrâniye ve li-ebeveyn ammim oğulları Ohannes ve Aleksan ve Artin evlâd-ı ( ) nâm zimmîler beynlerinde alâ mâ-farazallâhu te‘âlâ tevzî‘ ve taksîm eyleyeler deyü vasiyet ve tenfîzine zevcesi mersûme Sima Nasrâniyeyi vasîyy-i muhtâr nasb ü ta‘yîn eyledim dedi dedikde ol dahi ber-vech-i muharrer vesâyet-i mezkûreyi kabûl ve hizmet-i lâzımesin kemâ-yenbağī edâya ta‘ahhüd ve iltizâm etmeğin mâ-vaka‘a. Fî 29 S sene 1197 Şühûdü’l-hâl: Ahmed Efendi b. Mehmed Müezzin, es-Seyyid Mehmed Emin Efendi b. es-Seyyid Halil, es-Seyyid Osman b. Abdurrahim Müezzin, Kasab Ahmed Ağa b. Salih, Nakkāş Veliyüddin Beşe, Molla Ali b. Halil, Bekçi es-Seyyid Hasan b. Ali, Hoca İsmail Efendi, Ahmed Odabaşı b. ( ), Molla Ali b. Halil ve gayruhum. Serkiz v. İsail, Bala v. İsail.